အမှိုက်ပိတ်ဆို့နေသည့် နမ့်စန်မြို့ရှိ ရေငုတ်ဂူများကို သန့်ရှင်းရေးပြုလုပ်

.

၂၀၂၆ ခုနှစ်၊ ဧပြီလ ၂၇ ရက်

.

ရှမ်းပြည်နယ်တောင်ပိုင်း၊ နမ့်စန်မြို့ရှိ အမှိုက်များဖြင့် ပိတ်ဆို့နေသည့် ရေငုတ်ဂူများကို သန့်ရှင်းရေး ပြုလုပ် ဆောင်ရွက်လျက်ရှိကြောင်း မြို့မိမြို့ဖဖြစ်သူ တောင်တန်းလူငယ် ပရဟိတအသင်း ဥက္ကဋ္ဌ ဒေါက်တာ ကောင်းမြတ်သူ ထံက သိရသည်။

.

.

အဆိုပါ ရေငုတ်ဂူများ သန့်ရှင်းရေး ပြုလုပ်ခြင်းကို ဧပြီလ ၂၅ ရက်က စတင်၍ တောင်တန်းလူငယ် ပရဟိတသင်း၊ တာဝန်ရှိသူများ၊ ပရဟိတအသင်းအဖွဲ့များနှင့် ပြည်သူလူထု စုစုပေါင်း အင်အား ၂၀၀ ခန့်ဖြင့် ဆောင်ရွက်နေခြင်းဖြစ်ပြီး ဂူ အတွင်းရှိ အမှိုက်များ၊ သစ်လုံးများ၊ တုံးများနှင့် ရေစီးဖြင့် မျောပါလာသော အမှိုက်သရိုက်များကို ဆယ်ယူ သန့်ရှင်း‌ရေး ပြုလုပ်လျက်ရှိကြောင်း သိရသည်။

.

နမ့်စန်မြို့တွင် မိုးတွင်းကာလ ရေကြီးရေလျှံမှု မဖြစ်စေရန်အတွက် ကြိုတင်ပြင်ဆင်သည့် အနေဖြင့် ယင်းကဲ့သို့ ရေငုတ်ဂူများကို သန့်ရှင်းရေး ပြုလုပ်ခြင်းဖြစ်ကြောင်း သိရသည်။

.

ပြီးခဲ့သည့် ၂၀၂၅ ခုနှစ်က သန့်ရှင်းရေး ပြုလုပ်စဉ် ဂူ ၂ ခုသာ ဆောင်ရွက်ပြီးစီးခဲ့ပြီး မိုးရွာသွန်းမှုကြောင့် ဂူအမှတ် (၃) ကို ကောင်းမွန်စွာ မလုပ်ခဲ့ရ သဖြင့် ယခု ၂၀၂၆ ခုနှစ်တွင် ထိုဂူကို သေချာစွာ သန့်ရှင်းရေး ပြုလုပ်နေပြီး အမှိုက်နှင့် ပိတ်ဆို့မှုများ ကျန်ရှိ နေသေးသည့်အတွက် ယခု ဧပြီလကုန်ပိုင်းအထိ ပြုလုပ်ရန် ရှိနေကြောင်း ၎င်းထံက သိရသည်။

.

“နှစ်ရှည်လများ ပိတ်ဆို့နေတဲ့ တတိယဂူကို အဓိကထား သန့်ရှင်းရေးလုပ်နေပေမဲ့ ပိတ်ဆို့မှုက များတဲ့ အတွက် လုပ်ငန်းတွေ ဆက်လက်လုပ်ဆောင်ဖို့ ကျန်နေသေးပါတယ်” ဟု ဒေါက်တာ ကောင်းမြတ်သူ က ပြောသည်။

.

ယမန်နှစ် ၂၀၂၅ ခုနှစ်တွင် ဂူသန့်ရှင်းရေး လုပ်ဆောင်နိုင်ခဲ့သဖြင့် ရေကြီးရေလျှံမှု မရှိခဲ့သော်လည်း ၂၀၂၁ ခုနှစ်နှင့် ယင်းမတိုင်မီ ကာလများက နှစ်စဉ် ထိုဂူများတွင် ပိတ်ဆို့မှုကြောင့် နမ့်စန်မြို့၌ ရေကြီးရေလျှံမှု အကြီးအကျယ် ဖြစ်ပေါ်ခဲ့ရဖူးပြီး ပြည်သူများအနေဖြင့် ဘုန်းတော်ကြီးကျောင်းများနှင့် အားကစားရုံ တို့၌ ခိုလုံခဲ့ရဖူးသည်။

.

“ရေကြီးတဲ့အချိန်တုန်းက ပျက်စီးမှု သိန်းပေါင်း သောင်းနဲ့ချီ ရှိပါတယ်။ အိမ်တွင်းပရိဘောဂတွေ၊ ဈေးဆိုင်ခန်းတွေ ပျက်စီးတယ်။ ဝမ်းပျက်၊ ဝမ်းလျှောစတဲ့ ကျန်းမာရေးပြဿနာတွေ ဖြစ်လာတယ်။ အိမ်တွေ ထဲကို ရွှံ့နွံတွေ ၂ ပေလောက်အထိ တက်ခဲ့ရဖူးပါတယ်” ဟု ၎င်းက ဆက်လက်ပြောဆိုခဲ့သည်။

.

အဆိုပါ ရေငုတ်ဂူများသည် နမ့်စန်မြို့၊ အမှတ် (၁) ရပ်ကွက်အတွင်း အပေါက် ၃ ပေါက်အဖြစ် တည်ရှိပြီး နမ့်လတ်ချောင်းသည် ယင်းဂူများအတွင်းသို့ ငုတ်လျှိုးဝင်ရောက်သွားကာ အမှတ် (၂) ရပ်ကွက်အနီးရှိ နမ့်တိန်းချောင်းအတွင်းသို့ ပြန်လည် ထွက်ပေါ်စီးဆင်းသွားခြင်းဖြစ်ကြောင်း သိရသည်။

.

ထို့ကြောင့် နမ့်စန်မြို့ ရေကြီးရေလျှံမှုကို ကာကွယ်နိုင်ရန်အတွက် နောင်တွင် ဂူကို ရှောင်ကွင်း၍ နမ့်တိန်း ချောင်းဘက်သို့ တိုက်ရိုက်စီးဆင်းနိုင်မည့် တူးမြောင်းတစ်ခု တူးဖော်နိုင်ရန် တာဝန်ရှိသူများနှင့် လွှတ်တော် ကိုယ်စားလှယ်များ တိုင်ပင်ဆွေးနွေးလျက်ရှိပြီး လွှတ်တော်တွင် တင်ပြသွားမည်ဖြစ်ကြောင်း နမ့်စန်မြို့နယ် ပြည်သူ့လွှတ်တော်ကိုယ်စားလှယ် ဦးဌေးဝင်း ထံက သိရသည်။

.

ထို့အပြင် ပိတ်ဆို့မှု ထပ်မံမဖြစ်ပွားစေရန်အတွက် လတ်တလောတွင် ဂူပေါက်များသို့ မရောက်မီ အမှိုက်တား သံဇကာတပ်ရန် စီစဉ်ဆောင်ရွက်လျက်ရှိပြီး စည်းကမ်းမဲ့ အမှိုက်မပစ်ရန်အတွက်ကိုလည်း ပြည်သူများအား အသိပညာပေးလျက်ရှိကြောင်း နမ့်စန်မြို့နယ်အုပ်ချုပ်ရေးမှူး ဦးနေမျိုးထွန်းထံက သိရသည်။

.

၂၀၂၀ ပြည့်နှစ် COVID-19 ကပ်ရောဂါ ကူးစက်ဖြစ်ပွားစဉ်က စတင်၍ ရေငုတ်ဂူ သန့်ရှင်းရေး ပြုလုပ်ခြင်းကို ၃ နှစ်ကျော် ၄ နှစ်ခန့် ရပ်နားခဲ့ရဖူးကြောင်း သိရသည်။

.