ကလောမြို့အထွက် ရေယားကျေးရွာအနီးတွင် ထင်းရှူးတောကို ခုတ်ထွင်ပြီး ကျူးကျော်ခြံလုပ်ကိုင်မှုများ ရှိနေ

.

၂၀၂၆ ခုနှစ်၊ ဧပြီလ ၂၈ ရက်

.

ရှမ်းပြည်နယ်တောင်ပိုင်း၊ ကလောမြို့အထွက်၊ ရေယားကျေးရွာတွင် ထင်းရှူးတောကို ခုတ်ထွင်ရှင်းလင်းပြီး ခြံယာလုပ်ကိုင်မှုများ ရှိနေကာ သက်ဆိုင်ရာသို့ တိုင်ကြားသော်လည်း အရေးယူဆောင်ရွက်မှု မရှိကြောင်း သိရသည်။

.

.

“သစ်တောကို အကြောင်းကြားပါတယ်။ သူတို့က ကွင်းဆင်းသွားကြည့်ပေးမယ်ဆိုပြီးတော့ ဆက်ပြီး အလုပ် မလုပ်ဘူး။ အခုတော့ ထင်းရှူးပင်တွေက ပါးသထက် ပါးသွားပြီ။ ခြံတောင် ဖြစ်သွားပြီ။ မြေစာရင်းကတော့ ခွင့်မပြုဘူး။ သူတို့က သစ်တောကင်းလွတ်ခွင့်ရှိတယ် ပြောပါတယ်” ဟု အဆိုပါ ထင်းရှူးတောအနီး နေထိုင်သူတစ်ဦးက ကမ္ဘောဇတိုင်းသို့ ပြောသည်။

.

ထင်းရှူးတော ခုတ်ထွင်ကျူးကျော်သူများသည် ရေယားကျေးရွာအနီးဝန်းကျင် ဒေသများမှ ဖြစ်ပြီး ရေယား ကျေးရွာ၊ ဘုန်းတော်ကြီးကျောင်းအရှေ့ဘက် တစ်မိုင်ခန့်အကွာတွင် ကျူးကျော်လုပ်ကိုင်နေကြခြင်း ဖြစ်ကာ စုစုပေါင်း ဧက ၅၀ ကျော် ၆၀ နီးပါးခန့်ရှိကြောင်း သိရသည်။

.

“ထင်းရှူးပင်ကို အရင်ခုတ်တယ်။ သစ်ဆွဲတယ်။ ထင်းရှူးပင် မရှိတော့ သူတို့ခြံဖြစ်သွားပြီပေါ့။ ဒီလိုနည်းနဲ့ ကျူးကျော်နေတာပါ၊ ကိုယ်က သွားပြောရင် တစ်ယောက်ထဲဆိုတော့ သူတို့က ရန်ပြန်လုပ်ချင်တယ်” ဟု ၎င်းက ဆက်လက်ပြောဆိုခဲ့သည်။

.

ထို့အပြင် သက်ဆိုင်ရာ ကျေးရွာအုပ်ချုပ်ရေးမှူးထံသို့ သွားရောက်တင်ပြခဲ့သော်လည်း အုပ်ချုပ်ရေးမှူးက “ပိုင်ရှင်ရှိသည် မကျူးကျော်ရ” ဆိုင်းဘုတ် ချိတ်ဆွဲထားရန်သာ ပြောကြားခဲ့ပြီး ထင်းရှူးပင် ခုတ်ယူသူများကို အသိပေးတားမြစ်မှု မရှိကြောင်း သိရသည်။

.

ယင်းကဲ့သို့ ထင်းရှူးပင်များ ခုတ်ထွင်မှုကြောင့် ရာသီဥတု ဖောက်ပြန်လာနေသည့်အတွက် သက်ဆိုင်ရာ တာဝန်ရှိသူများအနေဖြင့် ထိထိရောက်ရောက် တားမြစ်အရေးယူစေလိုကြောင်း ကလောဒေသခံများထံက သိရသည်။

.

ထင်းရှူးတောများသည် ကလောမြို့၏ အထိမ်းအမှတ် သင်္ကေတတစ်ခုဖြစ်ပြီး လူဦးရေ တိုးတက်များပြားလာ သည်နှင့်အမျှ နေအိမ်နှင့် စိုက်ပျိုးမြေ ချဲ့ထွင်လာမှု၊ စီမံကိန်းလုပ်ငန်းများ တိုးချဲ့လာမှုကြောင့် လက်ရှိတွင် ထင်းရှူးတောများ နှစ်စဉ် လျော့နည်းပျောက်ကွယ်နေရခြင်းဖြစ်ကြောင်း သိရသည်။

.

၁၉၇၅-၂၀၂၅ ခုနှစ်၊ နှစ် ၅၀ အတွင်း သစ်တောပြုန်းတီးမှု အခြေအနေ မှတ်တမ်းများအရ ရှမ်းပြည်နယ်သည် မြန်မာတစ်နိုင်ငံလုံးတွင် သစ်တောပြုန်းတီးမှုနှုန်း အမြင့်ဆုံးပြည်နယ်တစ်ခုဖြစ်ကြောင်း သိရသည်။

.