မောင်းနှင်သည့် ခရီးအကွာအဝေးအလိုက် ဆီရောင်းချမည့်စနစ်ကို ထပ်ပြောင်း

.

၂၀၂၆ ခုနှစ်၊ ဧပြီလ ၃ ရက်

.

စွမ်းအင်ဝန်ကြီးဌာနက  ယနေ့  ဧပြီလ ၃ ရက်ကစပြီး မောင်းနှင်သည့် ခရီးအကွာအဝေး (Mileage) အလိုက် ဆီရောင်းချမည့်စနစ်သို့ ပြောင်းလဲလိုက်ကြောင်း ထုတ်ပြန်ထားသည်။

.

.

စက်သုံးဆီ ဝယ်ယူရာတွင် မသမာမှုများ မရှိစေရေးနှင့် စနစ်တကျ ဖြစ်စေရန် ရည်ရွယ်၍ ယင်းကဲ့သို့ ပြောင်းလဲ ကျင်းသုံးခြင်းဖြစ်ကြောင်း သိရသည်။

.

အဆိုပါစနစ်သစ်အရ အဓိကအားဖြင့်  ဦးစားပေးထိန်းကျောင်းသွားမည့် ယာဉ်များမှာTaxi အငှားယာဉ်များ၊ သုံးဘီးယာဉ်များ၊ ကုန်တင်ယာဉ်များ၊ အဝေးပြေးယာဉ်များနှင့် အများပြည်သူ သယ်ယူပို့ဆောင်ရေးယာဉ်များ အားလုံးကို ရည်ညွှန်းကြောင်း သိရှိရသည်။

.

ယခု အစီအစဉ်အရ ရည်ညွှန်းပါ ယာဉ်များအနေဖြင့် အမှန်တကယ် မောင်းနှင်ခဲ့သည့် ကီလိုမီတာ၊ မိုင် အကွာအဝေးပေါ် မူတည်ပြီးမှသာ ဆီပမာဏကို တွက်ချက်ဝယ်ယူခွင့် ရရှိမည်ဖြစ်ကြောင်း သိရသည်။

.

Taxi၊ သုံးဘီးယာဉ်နှင့် ကုန်တင်ယာဉ်များကို  ဆီပမာဏ ပိုမိုတိုးမြှင့်သတ်မှတ်ပေးထားပြီး တစ်ပတ်လျှင် ၃ ရက် ဆီဖြည့်တင်းခွင့် ပြုထားသည့်အတွက် စနစ်တကျ ဖြစ်သွားသည်ဟု ဆိုသည်။

.

ထို့အပြင် QR စနစ် ကို ရန်ကုန်၊ မန္တလေး၊ တောင်ကြီးမြို့များသာမက ပုသိမ်မြို့နှင့် ရန်ကုန် -ပြည်-မကွေး လမ်းမကြီးတစ်လျှောက်ရှိ ဆီဆိုင်များတွင် စတင်ကျင့်သုံးနေပြီဖြစ်ကြောင်း သိရသည်။

.

“ဒီအစီအစဉ်ကတော့ စောင့်ကြည့်ရမှာပေါ့။ ကညန အပွားတွေက ပြဿနာဖြစ်နေတာပါ။ ဆီဆိုင်နဲ့ ကညန ချိတ်ဆက်မှုကလည်း လိုအပ်ချက်တွေ များပြားနေတုန်းပဲ” ဟု တောင်ကြီးမြို့နေ အိမ်စီးကား မောင်းနှင်သူ တစ်ဦးက ပြောသည်။

.

မြန်မာတစ်နိုင်ငံလုံးတွင် စက်သုံးဆီအရောင်းဆိုင် ပေါင်း ၂၉၄၃ ဆိုင်ရှိသည့်အနက် ၈၇၉ ဆိုင်တွင် QR စနစ်ဖြင့် ရောင်းချနေကြောင်း စွမ်းအင်၏ ထုတ်ပြန်ချက်အရ သိရသည်။

.