တောင်ကြီးမြို့ပေါ်ရှိ ထရန်စဖော်မာအချို့တွင် ခြုံနွယ်ပိတ်ပေါင်းများ ပြည့်နှက်နေသည့် အတွက် မီးဘေးအန္တရာယ် စိုးရိမ်နေရ

.

၂၀၂၆ ခုနှစ်၊ ဧပြီလ ၆ ရက်

.

ရှမ်းပြည်နယ်မြို့တော် တောင်ကြီးမြို့ပေါ်ရှိ လျှပ်စစ်ထရန်စ‌ဖော်မာအချို့တွင် ခြုံနွယ်ပိတ်ပေါင်းများဖြင့် ပြည့်နှက်နေသည့်အတွက် လျှပ်စစ်ရှော့ခ်ဖြစ်ပြီး မီးလောင်မှု အန္တရာယ်ကို စိုးရိမ်နေရကြောင်း သိရသည်။

.

.

“တချို့နေရာက ထရန်စဖော်မာတွေ ဆိုရင် ခြုံတွေနဲ့ ပိတ်နေတာ။ တစ်ခုခု ရှော့ခ်ဖြစ်ပြီး မီးလောင်ရင် မလွယ်ပါဘူး။ သက်ဆိုင်တဲ့ လျှပ်စစ်ဌာနအနေနဲ့ ဒါကို ရှင်းလင်းသင့်ပါတယ်” ဟု တောင်ကြီးမြို့ပေါ်နေ ပြည်သူတစ်ဦးက ကမ္ဘောဇတိုင်းသို့ ပြောသည်။

.

လျှပ်စစ်ထရန်စဖော်မာများကို သက်ဆိုင်ရာ ဌာနက တာဝန်ယူ ထိန်းသိမ်းကြီးကြပ်မှု အားနည်းခြင်းကြောင့် ယင်းကဲ့သို့ ခြုံနွယ်ပိန်ပေါင်းများ ထူထပ်နေခြင်းဖြစ်ကြောင်း ဒေသခံများက ပြောဆိုကြသည်။

.

“ရပ်ကွက်တိုင်းမှာ ထရန်စဖော်မာတွေ ရှိပါတယ်။ ခြုံနွယ်တွေကို မရှင်းပါဘူး။ အခန့်မသင့်ရင် ဘယ်နေ့ မီးထလောင်မလဲမသိဘူး” ဟု ဒေသခံတစ်ဦးကလည်း ပြောဆိုခဲ့သသည်။

.

အဆိုပါကိစ္စနှင့် ပတ်သက်၍ တောင်ကြီးမြို့ရှိ လျှပ်စစ်ဓါတ်အားဖြန့်ဖြူးရေးလုပ်ငန်းရုံးသို့ ကမ္ဘောဇတိုင်းမှ သွားရောက်တွေ့ဆုံမေးမြန်းရန် ကြိုးပမ်းခဲ့သော်လည်း ရုံးဝန်ထမ်းများက လူကြီးနှင့် ကြိုတင်ဖုန်းဆက် ချိန်းဆိုထားခြင်းမရှိဘဲ အတွေ့မခံနိုင်ကြောင်းနှင့် ဖြေကြားနိုင်ခြင်း မရှိကြောင်း ပြန်လည်ပြောဆိုခဲ့သည်။

.

ပြီးခဲ့သည့် ဧပြီလ ၃ ရက်ကလည်း တောင်ကြီးမြို့၊ စိန်ပန်းရပ်ကွက်၊ နယ်မြေ (၁)၊ အောင်သပြေလမ်း၊ အမှတ် (၃) ဓါတ်အားခွဲရုံအနီးရှိ လျှပ်စစ်ထရန်စဖော်မာတွင် ကေဘယ်လ်ကြိုး ရှော့ခ်ဖြစ်ကာ မီးလောင်မှု ဖြစ်ပွားခဲ့သေးသည်။

.