တရုတ်မှာ ယောက်ျားလေး သန်း ၃၀ လောက် ရည်းစားရှာဖို့ ခက်ခဲနေ

ရည်းစားမရှိလို့ စိတ်ညစ်နေပါသလား။ ဒီဆောင်းပါးကိုသာဖတ်လိုက်ပါ။ ကိုယ်ကသာ ဘယ်အချိန်မဆို ရည်းစားတစ်ယောက် ကောက်ရနိုင်သေးပေမဲ့ တရုတ်နိုင်ငံမှာတော့ ယောက်ကျားလေး သန်း ၃၀ လောက်က ရည်းစားရှာဖို့ ခက်ခဲနေကြပါပြီ။ ဒီအချက်အလက်က တကယ်ပဲဖြစ်ပြီး CNA လို့ခေါ်တဲ့ Channel News Asia ရဲ့ဆောင်းပါးကို ပြန်လည်ဝေမျှပေးမှာပါ။
.
တရုတ်နိုင်ငံမှာ အမျိုးသားဦးရေက အမျိုးသမီးဦးရေထက် သန်း ၃၀ လောက် ပိုမိုများနေပြီမို့ ရည်းစားရဖို့ ပြိုင်ဆိုင်မှုတွေ ပြင်းထန်လာကြပြီး ရည်းစားရှာပေးတဲ့ အေဂျင်စီတွေ ပိုက်ဆံတော်တော်ဝင်လာကြတယ်လို့ အချက်အလက်တွေက ပြောနေပါတယ်။ မိန်းမတွေအနေနဲ့ ယောက်ျားတစ်ယောက်ကို ခေါင်းခေါက် ယူလို့ရနေပြီး ယောက်ျားလေးတွေကတော့ မိန်းကလေးတစ်ယောက် ရည်းစားမရှိဘူးဆိုရင် ရုပ်ချောချော မချောချော၊ ပိုက်ဆံရှိရှိ မရှိရှိ သိပ်ရွေးလို့မရတဲ့ အနေအထားတွေ ဖြစ်ကုန်တာပါ။
.
ကိုယ်တိုင်ရှာဖို့ ခက်နေတဲ့အနေအထားတွေကြောင့် အွန်လိုင်းပေါ်က ချစ်သူရှာပေးတဲ့ App တွေကို သုံးလာကြရသလို မိတ်ဖက်ရှာဖွေရေး ကျွမ်းကျင်သူတွေဆီကို အကူအညီတောင်းလာရပါတယ်။
.
အသက် ၃၃ နှစ်အရွယ်ရှိပြီဖြစ်တဲ့ ဇောင်း ဆိုတဲ့သူက အိုင်တီပိုင်းမှာ မန်နေဂျာတစ်ယောက်ပါ။ သူ့ရဲ့ဝင်ငွေက တစ်နှစ်ကို ဒေါ်လာ ၄၀၀၀၀ ကျော်လောက်ရှိပြီး တိုက်ခန်း ၂ ခန်း ပိုင်ဆိုင်ထားသလို တည်ငြိမ်တဲ့ဘဝကို ပိုင်ဆိုင်နေတဲ့သူပါ။ သူ့အတွက် တစ်ခုတည်းသော ပြသနာက ရည်းစားရှာလို့မရတာပဲဖြစ်ပြီး အသက် ၃၃ နှစ်အရွယ်ရောက်တဲ့အထိ ရည်းစားမရနိုင်ပဲဖြစ်ခဲ့ပါတယ်။ ဒါကြောင့်ပဲ သူက မိတ်ဖက်ရှာဖွေရေး ကျွမ်းကျင်သူတွေကိုငှားပြီး ရည်းစားရဖို့ ကြိုးစားနေရရှာတာပါ။
.
ဒီလိုအခြေအနေတွေမှာ တရုတ်နိုင်ငံရဲ့ အိမ်ထောင်ပြုမှုနှုန်းကလည်း လျော့ကျသွားခဲ့ပြီး ၂၀၂၅ ခုနှစ်အတွင်း လက်ထပ်ခဲ့တဲ့ စုံတွဲအရေအတွက် ၆ ဒသမ ၇၆ သန်းသာ ရှိတော့တာပါ။ ဒီအရေအတွက်က ပြီးခဲ့တဲ့ ၁၀ နှစ် တုန်းကနဲ့ယှဉ်ရင် တစ်ဝက်သာ ရှိတော့တာ ဖြစ်ပါတယ်။
.
ဒါ့အပြင် နှစ်ပေါင်းများစွာ ကျင့်သုံးလာခဲ့တဲ့ တစ်အိမ်ထောင် ကလေးတစ်ယောက်ပဲယူရမယ်ဆိုတဲ့ မူဝါဒ၊ သားယောက်ျားလေးကိုသာ ပိုပြီးလိုချင်တဲ့ ယဉ်ကျေးမှုတွေကြောင့် အမျိုးသားဦးရေက တစ်စထက်တစ်စ များပြားလာတာပါပဲ။
.
တရုတ်နိုင်ငံရဲ့မြို့အသီးသီးမှာ ရှိကြတဲ့ အသက် ၂၀ ကနေ ၃၀ အတွင်း လူငယ်တွေဟာ မိတ်ဖက်ရှာဖွေရေး ဝန်ဆောင်မှုတွေမှာ စာရင်းသွင်းထားကြသလို အွန်လိုင်းကနေလည်း ဆက်တိုက်ရှာဖွေနေကြတာပါ။
.
လူငယ်အမျိုးသားတွေအတွက် အခက်အခဲနောက်တစ်ခုက အမျိုးသမီးတွေနဲ့ တွေ့ဆုံဖို့ အချိန်မပေးနိုင် ဖြစ်လာကြတာပါ။ တရုတ်နိုင်ငံရဲ့များပြားတဲ့အလုပ်ချိန်ကြောင့် လူငယ်တွေဟာ ကိုယ့်ပတ်ဝန်းကျင်က အမျိုးသမီးတွေကလွဲရင် တခြားနေရာတွေက အမျိုးသမီးတွေကို မတွေ့နိုင်ပဲဖြစ်လာကြပါတယ်။
.
အေဂျင်စီတွေကို အပ်လိုက်တယ်ဆိုရင်တော့ ကိုယ်နဲ့ မရင်းနှီးသေးတဲ့ မိန်းကလေးနဲ့ မိနစ် ၃၀ တွေ့ဆုံ စကားပြောခွင့်ရပြီး နောက်တစ်ကြိမ် ပြောခွင့်ရ၊ မရကတော့ ကိုယ့်ရဲ့စွမ်းရည်ပေါ်မှာသာ မူတည် တော့တာပါ။
.
ရှန်တုံမြို့နယ်အခြေစိုက်တဲ့ မိတ်ဖက်ရှာဖွေရေးကျွမ်းကျင်သူ ဂွမ်လီ ကတော့ ဒီနေ့ခေတ်အမျိုးသမီးတွေဟာ ကားပိုင်တဲ့သူ၊ အိမ်ချေးငွေမရှိတဲ့သူ၊ အိပ်ခန်း ၃ ခန်း အနည်းဆုံးပါတဲ့ တိုက်ခန်းပိုင်ဆိုင်တဲ့သူကိုမှ လက်တွဲဖော်အဖြစ် မျှော်လင့်လာတဲ့အကြောင်း ဖွင့်ဟပါတယ်။ သူတို့ရဲ့စံနှုန်းနဲ့ မညီဘူးဆိုရင် ငြင်းပယ်ဖို့ အတွက် မနှောင့်နှေးတတ်ကြဘဲ နောက်ထပ် ချိတ်ဆက်သူကိုသာ အသင့်စောင့်နေကြတာပါ။
.
ဒါ့အပြင် အစိုးရပိုင်ကုမ္ပဏီတွေမှာ အလုပ်လုပ်တဲ့သူ၊ လစဉ်ဝင်ငွေက အနည်းဆုံး ယွမ် ၁၂၀၀၀ ရှိတဲ့သူ၊ အကျိုးခံစားခွင့်ကောင်းတွေနဲ့ ပင်စင်ကောင်းကောင်းရှိသူတွေကိုလည်း မိန်းကလေးတွေက သဘောကျ ကြပါတယ်။
.
အသက် ၃၁ နှစ်အရွယ်ရှိပြီဖြစ်တဲ့ စက်ကိရိယာအရောင်းဝန်ထမ်း ဂေါင်ဇူ ဆိုတဲ့သူကတော့ အဲဒီစံနှုန်းတွေနဲ့ မကိုက်ညီတဲ့အပြင် အိမ်ဝယ်ထားတဲ့ချေးငွေကိုလည်း ဆပ်နေရတာပါ။ ဒီအကျိုးဆက်အနေနဲ့ အမျိုးသမီး တွေနဲ့ Blind Date ၃ ကြိမ်တွေ့ခဲ့ပြီး အကြိမ်တိုင်းမှာ အမျိုးသမီးတွေက ထပ်တွေ့ဖို့ အငြင်းခံရရှာတာပါ။
.
တချို့အမျိုးသားတွေကျပြန်တော့လည်း သူတို့သတ်မှတ်ထားတဲ့ စံနှုန်းတွေမြင့်တာကြောင့် ရည်းစားမရနိုင် ကြရှာပါဘူး. အသက်ငယ်ရမယ်၊ ရုပ်ချောရမယ်၊ နားလည်မှုပေးနိုင်ရမယ် စတဲ့မိန်းကလေးမျိုးကို လိုချင် ကြတာဖြစ်ပြီး ပညာရေးအဆင့်မြင့်ဖို့ကိုလည်း သူတို့ရဲ့လိုအပ်ချက်ထဲမှာ ထည့်ထားကြပြန်ပါတယ်။
.
“ကိုယ်က သိပ်မသိတဲ့ သူတစ်ယောက်နဲ့ လက်ထပ်ရမယ်ဆိုရင် ပညာတတ်တာက အာမခံတစ်ခုလိုပဲ”လို့ အသက် ၂၈ နှစ်အောက် မိန်းကလေးတစ်ယောက်ယောက်နဲ့ ရည်းစားဖြစ်ချင်နေတဲ့ ကွန် က ပြောပါတယ်။
.

ရှန်ဇီပြည်နယ်မှာနေတဲ့ အသက် ၂၉ နှစ်အရွယ် အစိုးရဝန်ထမ်းဖြစ်တဲ့ ချန် ဟာ သူ့ကိုယ်သူ ဉာဏ်ရည် မြင့်တယ်လို့ ထင်သူပါ။ သူ့ကိုမိတ်ဆက်ပေးတဲ့ အမျိုးသမီးတွေကို ရုပ်မလှခြင်း၊ ခန္ဓာကိုယ်မလှခြင်း ဆိုတဲ့အကြောင်းပြချက်တွေနဲ့ ငြင်းခဲ့ပါတယ်။ ဒါပေမဲ့ ရုပ်ချောတဲ့မိန်းကလေးတွေနဲ့ တွေ့ရပြန်တော့လည်း ချန် ဆီမှာ ဉာဏ်ကောင်းတာကလွဲရင် ဘာမှ မရှိတာမို့ ချောမောတဲ့မိန်းကလေးတွေက သူ့ကို ငြင်းကြ ပြန်ပါတယ်။
.
ဒီနေ့ခေတ်မှာတော့ မိတ်ဖက်ရှာဖွေရေးဝန်ဆောင်မှုကို အသုံးပြုလာသူအများစုက လူငယ်တွေဖြစ်လာကြပြီး တချို့ကလည်း အသက်ငယ်နေချိန်မှာတောင် ရည်းစားရှာမရတာမို့ စိတ်ပူပြီး မိတ်ဖက်ဝန်ဆောင်မှုတွေဆီ ရောက်လာကြတာပါ။
.
အမျိုးသမီးတွေကတော့ ငယ်ရွယ်လေလေ ယောက်ျားကောင်းနဲ့ တွေ့နိုင်ဖို့ ပိုများလေဆိုတာကို နားလည်လာကြပြီး ငယ်ရွယ်ချိန်မှာတင် ချစ်သူတစ်ယောက်နဲ့တွေ့ချင်လာကြတာပါ။
.
အစိုးရမူဝါဒတွေမှာတောင် ပြောင်းလဲမှုတွေရှိလာပြီး အိမ်ထောင်သည်စုံတွဲတွေအတွက် အကျိုးခံစားခွင့်တွေ များလာသလို၊ Single မိခင်တွေအတွက်လည်း အကျိုးခံစားခွင့်တွေ ပေးလာကြပါတယ်။
.
တရုတ်နိုင်ငံရဲ့ လက်ရှိအနေအထားအရတော့ ရည်းစားရှိသူက ဆရာကြီးပဲဖြစ်ပြီး ရည်းစားမရှိသူတွေ အတွက်တော့ မျက်နှာငယ်စရာကောင်းလွန်းလှပါတော့တယ်။
.
#KBZTai #International #China