တောင်ကြီးမြို့ရှောင်လမ်း ဆိုးရွားစွာပျက်စီးနေပြီး ပြုပြင်ရန် လိုအပ်နေ

.

‌၂၀၂၆ ခုနှစ်၊ မေလ ၁ ရက်

.

ရှမ်းပြည်နယ်မြို့တော် တောင်ကြီးမြို့၊ မြို့ရှောင်လမ်း၊ လေးမိုင်ကွေ့-နောင်တလိ-ညိုမီး-နောင်ပနားဗွာ-လင်းကွင်း-ထီရီး (မွေးမြူရေးဇုန်) လမ်းမှာ ဆိုးရွားစွာ ပျက်စီးနေပြီး အတက်အဆင်း၊ အကွေ့အကောက် များကာ မတ်စောက်သည့်အတွက် ပြုပြင်ရန် လိုအပ်နေကြောင်း ယာဉ်မောင်းများထံက သိရသည်။

.

.

အဆင်းလမ်းအဖြစ် အသုံးပြုနေသည့် အဆိုပါ မြို့ရှောင်လမ်းတွင် တောင်ကြီးမှ လမ်းငါးဆုံအဝိုင်းအထိ လမ်းပိုင်းမှာ အသင့်အတင့် ကောင်းမွန်သော်လည်း အဝိုင်းပတ်မှ မွေးမြူရေးဇုန်အထိ လမ်းတစ်လျှောက်မှာ အတက်အဆင်း မတ်စောက်သည့်အပြင် ရေတိုက်စားမှုကြောင့် လမ်းကတ္တရာသားများ ပျက်စီးနေခြင်း၊ လမ်းဘေး ဖို့မြေနေရာများမှာ မြေသားမခိုင်ခန့်ဘဲ ရေတိုက်စားမှုကြောင့် ပြိုကျခြင်းများ ရှိနေပြီး ယာဉ်အန္တရာယ်၊ လမ်းအန္တရာယ် ဖြစ်ပေါ်မည်ကို စိုးရိမ်နေရကြောင်း သိရသည်။

.

“တောင်ကြီးမြို့ထဲကနေ အဝိုင်းပတ်လောက်အထိကတော့ အဆင်ပြေတယ်။ အဝိုင်းပတ်ကျော်ရင် ‘S’ ကွေ့တွေ၊ အဆင်းအတက်တွေနဲ့ လမ်းက အရမ်းမတ်စောက်တယ်။ လင်းကွင်းရွာကနေ မွေးမြူရေးဇုန် ရောက်တဲ့အထိက တောက်လျှောက်အဆင်းချည်းချည်းပဲ ဆိုတော့ တော်တော်ကို သတိထားပြီး မောင်းနေရ ပါတယ်” ဟု ကုန်တင်ယာဉ်မောင်းတစ်ဦးက ပြောသည်။

.

အဆိုပါ မြို့ရှောင်လမ်းသည် လမ်းအရည်အသွေး မပြည့်မီသည့်အပြင် လမ်းကြမ်းသည့်အတွက် ယာဉ်မတော် တဆမှုများ မကြာခဏဖြစ်ပွားတတ်လေ့ရှိပြီး ယာဉ်မောင်းများအနေဖြင့် ဂရုပြုမောင်းနှင်ရန် လိုအပ်ကြောင်း နှင့် လမ်းပိုင်းကျွမ်းကျင်သူများသာ မောင်းနှင်သင့်ကြောင်း ယာဉ်မောင်းများက ပြောဆိုကြသည်။

.

ထို့အတူ အခြား ယာဉ်မောင်းတစ်ဦးကလည်း “လမ်းက ဆိုးတယ်။ ကားငယ်တွေကျတော့လည်း အောက်ပိုင်း မလွတ်လို့ သွားမရဘူး။ ကားကြီးတွေကျတော့ အကွေ့အကောက်များလို့ အန္တရာယ်များတယ်။ ဘာကားမှကို သွားလို့မရတဲ့လမ်း၊ သုံးမရတဲ့လမ်းလို ဖြစ်နေတယ်။ အရည်အသွေး ပြည့်မီအောင် ပြင်ဆင်ပေးဖို့ လိုပါတယ်” ဟု ပြောဆိုခဲ့သည်။

.

ယင်းမြို့ရှောင်လမ်းကို ကုန်တင်ယာဉ်ကြီးများ၊ တွဲယာဉ်များအတွက် အဆင်းလမ်းအဖြစ် အသုံးပြုနေခြင်း ဖြစ်ပြီး ယာဉ်ကြီးများအတွက် အတက်လမ်းကို တောင်ကြီးအတက် ၂ ထပ်လမ်း၊ ထုံးဖိုဘက်မှသာ အချိန်ပိုင်း ဖြင့် လွှတ်ပေးနေခြင်းဖြစ်ကြောင်း သိရသည်။

.