စင်ကာပူမှာ ကျောင်းတွင်းအနိုင်ကျင့်သည့် အသက် ၉ နှစ်အရွယ် ကျောင်းသားတွေကိုပါ ကြိမ်ဒဏ် ခွင့်ပြုဖို့ ပညာရေးဝန်ကြီး အတည်ပြု

စင်ကာပူနိုင်ငံအတွင်း ကျောင်းတွေမှာ ကျောင်းတွင်း အနိုင်ကျင့်မှုတွေနဲ့ ပတ်သက်ပြီး စည်းမျဉ်း အသစ်တွေ အသုံးပြုတော့မယ် ဆိုတဲ့အကြောင်း စင်ကာပူ ပညာရေးဝန်ကြီး ဒက်စ်မွန်လီ က အတည် ပြုလိုက်ပါတယ်။

.

၂၀၂၇ မှာ စတင်တော့မယ့် စည်းမျဉ်းအသစ်တွေမှာတော့ အသက် ၉ နှစ်အရွယ် ကျောင်းသားလေးတွေ ဆိုရင်တောင် ကျောင်းတွင်း အနိုင်ကျင့်မှုတွေကို ပြုလုပ်ခဲ့မယ်ဆိုရင် ကြိမ်ဒဏ်နဲ့ အပြစ်ပေးခံရမယ်လို့ ပါရှိမှာပါ။

.

ဒက်စ်မွန်လီ က လွှတ်တော်မှာ “စည်းကမ်း ထိန်းသိမ်းရေး နည်းလမ်းတွေနဲ့ ထိန်းသိမ်းပေးလို့ မရတော့တဲ့ အခြေအနေတွေမှာ ဒါမှမဟုတ် ကျူးလွန်လိုက်တဲ့ ပြစ်မှုက ပြင်းထန်တဲ့ အခြေအနေတွေမှာ ကြိမ်ဒဏ် ပေးမှုကို နောက်ဆုံးနည်းလမ်း အဖြစ် အသုံးပြုသွားပါ့မယ်” လို့ တင်ပြထားပါတယ်။

.

အဲဒီကြိမ်ဒဏ်က ယောင်္ကျားလေးတွေ အတွက်ပဲ ဖြစ်ပြီး မိန်းကလေးတွေကတော့ ကြိမ်ဒဏ်ကနေ ကင်းလွတ်ခွင့် ရထားပါတယ်။ ကြိမ်ဒဏ်ပေးသင့် မပေးသင့်ဆိုတာကိုလည်း ကျောင်းအုပ်ကြီးကပဲ ဆုံးဖြတ်ရမှာ ဖြစ်ပြီး သူ တာဝန်ချထားတဲ့ ဆရာကပဲ ကြိမ်ဒဏ်ပေးခွင့် ရှိမှာပါ။

.

စည်းမျဉ်းအသစ်မှာ ပါဝင်လာမယ့် အဓိက အချက်တွေကတော့ ကျောင်းတွင်းအနိုင်ကျင့်မှုတွေအတွက် ကျောင်းတိုင်းမှာ တူညီတဲ့အပြစ်ပေးစနစ် အသုံးပြုရမယ်၊ ကျောင်းယာယီ နားခိုင်းတာ၊ အမှတ် လျှော့တာ၊ ဆွေးနွေးမှုနဲ့ စောင့်ကြည့်မှု ခံယူစေတာ၊ အွန်လိုင်းကနေ ပြောင်းလဲသင်ယူမှု လုပ်ခိုင်းတာ စတဲ့အချက်တွေ ပါလာမှာပါ။

.

ကြိမ်ဒဏ်နဲ့ ပတ်သက်ပြီး ပါဝင်လာမယ့် အချက်တွေက အသက် ၉ နှစ်ကနေ စပြီး ကြိမ်ဒဏ်ပေးနိုင်မယ်၊ ဆိုးရွားတဲ့ ပြစ်မှုကို ပထမအကြိမ်ကျုးလွန်ရင် ၁ ချက်၊ အလားတူ ပြစ်မှုကိုပဲ ဒုတိယအကြိမ် ထပ်ကျုးလွန်ရင် ၃ ချက် စတာတွေပဲ ဖြစ်ပါတယ်။

.

ကမ္ဘာ့ကျန်းမာရေးအဖွဲ့ WHO ကတော့ ကလေးတွေကို ကိုယ်ထိလက်ရောက် အပြစ်ပေးခြင်းဟာ အကျိုးဆက်အနေနဲ့ စိတ်ပိုင်းဆိုင်ရာ ခံစားမှုတွေကို တသက်တာလုံး ခံစား သွားရနိုင်ပြီး အလုပ်အကိုင်၊ ကျန်းမာရေး၊ ပညာရေး၊ လူမှုရေးတွေကိုပါ ထိခိုက်စေနိုင်လိမ့်မယ်လို့ ၂၀၂၅ အစီရင်ခံစာမှာ ဖော်ပြထားပါတယ်။

.