ကြည့်ရှုသူအမြင့်ဆုံးစံချိန် မှတ်တမ်းရရှိနေတဲ့ The Scarecrow ရုပ်သံဇာတ်လမ်းတွဲ

.

၂၀၂၆ ခုနှစ်၊ မေလ ၆ ရက်

.

ကိုရီးယားသမိုင်းမှာ နာမည်ကြီးတဲ့ ဟွာဆောင်းကွင်းဆက်လူသတ်မှု ဖြစ်စဉ်အကြောင်းကို ကျောရိုးယူပြီး ရိုက်ကူးထားတဲ့ The Scarecrow ရုပ်သံဇာတ်လမ်းတွဲကတော့ ENA ရုပ်သံသမိုင်းတစ်လျောက် ကြည့်ရှုသူ အမြင့်ဆုံး စံချိန်ကို ပိုင်ဆိုင်နေခဲ့ပါပြီ။

.

.

ဒါတောင် ဒီဇာတ်လမ်းတွဲက အပိုင်း ၆ ပိုင်းသာ ထုတ်လွှင့်ရသေးတာဖြစ်ပြီး လက်ရှိမှာ ထုတ်လွှင့်နေဆဲ ဇာတ်လမ်းတွဲပါ။

.

မေလ ၅ ရက်နေ့မှာ ထုတ်လွှင့်ခဲ့တဲ့ အပိုင်းသစ်မှာတော့ အမြင့်ဆုံးကြည့်ရှုသူ အရေအတွက်ကို ထပ်မံ ရောက်ရှိခဲ့ပြီး အပိုင်းသစ်တင်လိုက်တိုင်းမှာ ကြည့်ရှုသူတိုးမြင့်လာတဲ့ စံချိန်ကိုလည်း ဆက်လက်ရရှိနေဆဲ ဖြစ်ပါတယ်။ အဲဒီအပိုင်းမှာ တစ်နိုင်ငံလုံးပျမ်းမျှကြည့်ရှုနှုန်း ၇.၄၁% ရရှိခဲ့ပြီး နိုင်ငံတဝှမ်း တချိန်တည်း ထုတ်လွှင့်နေတဲ့ ချန်နယ်တွေအားလုံးထဲမှာ ကြည့်ရှုနှုန်းအမြင့်ဆုံး ဖြစ်ခဲ့တာပါ။

.

ဒါ့အပြင် အင်္ဂါနေ့မှာ ပြသနေတဲ့ ရုပ်သံအစီအစဉ်တွေ အားလုံးထဲမှာ လူကြည့်အများဆုံး ဖြစ်ခဲ့ပြီး မနှစ်က စံချိန်တင်ထားတဲ့ Ms. Incognito ရဲ့ ၇.၁%ကို ကျော်ဖြတ်သွားခဲ့တာဖြစ်ပါတယ်။

.

ဒီဇာတ်လမ်းတွဲမှာ Squid Game ထဲက မင်းသား ပတ်ဟေဆိုး၊ Mouse ဇာတ်လမ်းထဲက မင်းသား လီဟေးဂျွန် တို့ ပါဝင်ထားကြပြီး မင်းသမီးကတော့ Crash ဇာတ်လမ်းတွဲထဲက မင်းသမီး ကွက်ဆွန်ယောင်းပါ။

.

ဇာတ်လမ်းအကျဉ်းကတော့ ဆိုးလ်ကနေ နယ်မြို့လေးဆီ ရာထူးအချခံလိုက်ရတဲ့ စုံထောက်တစ်ယောက်ဟာ ပြီးခဲ့တဲ့ ၃၃ နှစ်က ကွင်းဆက်လူသတ်သမားတစ်ယောက်ရဲ့အမှုဟောင်းကို ပြန်လည်စုံစမ်းဖို့ ဖြစ်လာတဲ့ အကြောင်းပါ။ လူသတ်မှုရဲ့နောက်ကွယ်က ရှုပ်ထွေးမှုတွေ၊ မထင်မှတ်ထားတဲ့ လျှို့ဝှက်ချက်တွေကြားမှာ ရင်တထိတ်ထိတ်နဲ့ စောင့်ကြည့်ရတဲ့ကားမို့ ကြည့်ရှုနှုန်းမြင့်နေသလို၊ ပရိသတ်စိတ်ဝင်စားမှုကလည်း အပတ်စဉ်တိုင်း ရှိလို့နေတာပါ။

.