.
၂၀၂၆ ခုနှစ်၊ မေလ ၁၁ ရက်
.
ပြီးခဲ့တဲ့ ၂၀၂၅ စက်တင်ဘာမှာ ထောင်ဒဏ်တစ်နှစ်
ချမှတ်ခံရပြီး သံတိုင်တွေနောက် ရောက်သွားခဲ့တဲ့ ထိုင်းဝန်ကြီးချုပ်ဟောင်း သက်ဆင်က
ထောင်ဒဏ်ပြည့်ဖို့ ၄ လ အလိုမှာပဲ ပြန်လွတ်လာခဲ့ပါတယ်။
.
ပြီးခဲ့တဲ့ အနှစ် ၂၀ အတွင်း အချိန်အများစုကို
ပြည်ပနိုင်ငံတွေမှာ ထွက်ပြေးတိမ်းရှောင်ရင်း ကုန်ဆုံးနေခဲ့တဲ့ သက်ဆင် ဟာ အသက် ၇၆
နှစ်အရွယ်ရှိပြီဖြစ်ပြီး အီလက်ထရောနစ် ခြေကျင်းဝတ်စောင့်ကြည့်စနစ်နဲ့အတူ
ပြန်လွတ်လာခဲ့တာပါ။
.
၂၀၀၁ ကနေ ၂၀၀၆ ခုနှစ်အထိ
ဝန်ကြီးချုပ်တာဝန်ထမ်းဆောင်စဉ် ကာလတွေမှာ အကျင့်ပျက်ခြစားမှုနဲ့
အာဏာအလွဲသုံးစားလုပ်မှုတွေကြောင့် ထောင်ဒဏ်တစ်နှစ်ချမှတ်ခံခဲ့ရတာပါ။
.
လက်ရှိမှာတော့ သူ့ရဲ့ပါတီဖြစ်တဲ့
ဖွေထိုင်းပါတီရဲ့ နောက်ကွယ်မှာသာ နေတော့မယ်လို့ သက်ဆင်က ပြောဆိုထားပေမဲ့လည်း
သူ့ရဲ့နိုင်ငံရေးအရ ပြန်လည်ပါဝင်လာနိုင်မှုတွေအပေါ် စိတ်ပူပန်သူတွေလည်း
ရှိနေပါတယ်။
.
၂၀၀၁ ခုနှစ် ဇန်နဝါရီမှာ အာဏာရလာခဲ့ပြီးတဲ့နောက်
သက်ဆင် ဟာ ထောက်ခံသူတွေနဲ့ ဆန့်ကျင်သူတွေကို တစ်ပြိုင်တည်း ရရှိခဲ့တာပါ။ ၂၀၀၆
ခုနှစ်မှာ စစ်တပ်အာဏာသိမ်းမှုကြောင့် ရာထူးကနေ ဖယ်ရှားခံခဲ့ရ ပေမဲ့လည်း
သူ့ရဲ့ပါတီကတော့ ရွေးကောက်ပွဲတွေမှာ ဆက်လက် အနိုင်ရနေခဲ့ပါတယ်။
.
ထိုင်းဘုရင်ကို ထောက်ခံသူတွေဖက်ကတော့ သက်ဆင်ရဲ့
အာဏာတိုးချဲ့ချင်တဲ့ ရည်မှန်းချက်အပေါ် စိုးရိမ်ခဲ့ကြပြီး သက်ဆင်ရဲ့မဟာမိတ်တွေကို
အရေးယူမှုတွေပြုလုပ်ခဲ့တာပါ။ အဲဒါကြောင့်ပဲ ၂၀၁၄ ခုနှစ်မှာ နောက်တစ်ကြိမ်
စစ်အာဏာသိမ်းမှု ထပ်ပြီး ဖြစ်ပေါ်ခဲ့တာပဲ။
.
သက်ဆင်က အာဏာသိမ်းမှုတွေအပေါ်
လက်လျော့သွားခြင်းမရှိဘဲ နိုင်ငံပြင်ပကနေ သူ့ရဲ့ပါတီကို ဆက်လက်ဦးဆောင်ခဲ့ပါတယ်။
၂၀၂၃ ခုနှစ်မှာ သူ့ရဲ့နိုင်ငံရေးပြိုင်ဖက်တွေက သက်ဆင် ကို ထိုင်းနိုင်ငံဆီ
ပြန်လာဖို့ ခွင့်ပြုခဲ့ပြီး ၂၀၂၅ စက်တင်ဘာမှာ ထောင်ဒဏ်ချမှတ်ဖို့
ဆုံးဖြတ်ခဲ့တာဖြစ်ပါတယ်။ သက်ဆင်က ထိုင်းကို ပြန်လာပြီးတဲ့နောက် ရဲဆေးရုံမှာ ၆
လကြာနေထိုင်ခဲ့ပြီး ဒီလုပ်ရပ်က ထောင်ဒဏ်ကို ရှောင်ရှားဖို့ ကြိုးစားမှုတစ်ခုသာ
ဖြစ်တယ်လို့ ထိုင်းအဆင့်မြင့်တရားရုံးက ဆုံးဖြတ်ခဲ့ပါတယ်။
.
အဲဒီ ဆုံးဖြတ်ချက်မတိုင်မီ ၂ ပတ်အလိုမှာပဲ
သက်ဆင်ရဲ့သမီးဖြစ်တဲ့ ပီတောင်တန် ရှင်နာဝပ် က ဝန်ကြီးချုပ် ရာထူးကနေ
ဖယ်ရှားခံခဲ့ရပါတယ်။ အကြောင်းရင်းကတော့ သူမနဲ့ ဟွမ်ဆမ်တို့အကြား
ထိုင်း-ကမ္ဘောဒီးယား နယ်စပ်အငြင်းပွားမှုနဲ့ ပတ်သက်တဲ့ ဖုန်းပြောဆိုမှု
ပေါက်ကြားသွားခဲ့တာကြောင့်ပါ။
.
သက်ဆင် ထောင်ကျနေစဉ်အချိန်မှာ ဖွေထိုင်းပါတီက
ဖေဖော်ဝါရီရွေးကောက်ပွဲကို ယှဉ်ပြိုင်ခဲ့ပြီး ပါတီ သမိုင်းတစ်လျောက် အဆိုးဆုံး
ရလာဒ်ကို ရရှိခဲ့ပါတယ်။ ပြုပြင်ပြောင်းလဲရေးကို လိုလားတဲ့ ပြည်သူ့ပါတီနဲ့
ဘွန်ဂျိုင်ထိုင်းပါတီ တို့ရဲ့နောက် တတိယနေရာအထိ ကျဆင်းသွားခဲ့တာပါ။
.
နိုင်ငံရေးသုံးသပ်သူတွေကတော့ သက်ဆင်
ပြန်လာပြီဆိုပေမဲ့ သူ့ရဲ့ဖွေထိုင်းပါတီကတော့ နိုင်ငံရေးအရ အောင်မြင်ဖို့ လွယ်ကူမှာ
မဟုတ်တော့တဲ့အကြောင်း မှတ်ချက်တွေ ပေးနေကြပါတယ်။
.
No comments:
Post a Comment