ဝက်စ်ဟမ်းနဲ့ ပွဲ နိုင်ရင် အာဆင်နယ် ချန်ပီယံ ဖြစ်ပြီလို့ ကာရေဂါ ပြော

ဒီတစ်ပတ် တနင်္ဂနွေမှာ ကစားရမယ့် ဝက်စ်ဟမ်းနဲ့ ပွဲစဉ်ကိုသာ နိုင်ခဲ့ရင် အာဆင်နယ်အသင်း ပရီးမီးယားလိဂ် ချန်ပီယံ ဖြစ်ပြီလို့ လီဗာပူးလ် ကစားသမားဟောင်း ကာရေဂါက ခန့်မှန်းလိုက်ပါတယ်။

.
ပြီးခဲ့တဲ့ တစ်ပတ်ပွဲမှာ မန်စီးတီးတို့ သရေကျသွားခဲ့တာကြောင့် အာဆင်နယ်က အမှတ်ပေး ဇယားရဲ့ ထိပ်ဆုံးမှာ မန်စီးတီးထက် တစ်ပွဲ ပို ကစားပြီး ၅ မှတ်အသာနဲ့ ရပ်တည်နေခဲ့ပါတယ်။

.
ဒီ တစ်ပတ်မှာတော့ အာဆင်နယ်က ဝက်စ်ဟမ်းနဲ့ ကစားရမှာ ဖြစ်ပြီး နောက်ထပ် ပွဲစဉ် ၂ ပွဲဖြစ်တဲ့ ဘန်လေ၊ ပဲလေ့စ်တို့နဲ့ ပွဲတွေကို မေလထဲမှာ ကစားသွားရမှာပါ။

.
ဘန်လေရဲ့ ခြေစွမ်းက အာဆင်နယ်ကို ယှဉ်နိုင်မှာ မဟုတ်တဲ့အပြင် ပဲလေ့စ်ကလည်း အမှတ် မလိုတော့တဲ့ အနေအထားမို့ အာဆင်နယ် အနေနဲ့ ဒီတစ်ပတ် ပွဲကိုသာ နိုင်လိုက်ရင် ချန်ပီယံ ဖြစ်ဖို့ သေချာသွားပြီလို့ ကာရေဂါက သုံးသပ်လိုက်တာပါ။

.
အာဆင်နယ် တိုက်စစ်မှုူးဟောင်း ဖြစ်တဲ့ အွန်နရီကလည်း လက်ရှိအချိန်မှာ ပရီးမီးယားလိဂ် ချန်ပီယံဆုအတွက် အဆုံးအဖြတ် ပေးနိုင်မယ့်သူက အာဆင်နယ် ကိုယ်တိုင်ပဲလို့ မှတ်ချက်ပေးလိုက်ပါတယ်။

.
“အာဆင်နယ် အနေနဲ့ သူတို့ရဲ့ သမိုင်းကို သူတို့ ရေးရတော့မှာပါ။ မန်စီးတီးရဲ့ လက်ထဲမှာ ဆုဖလားနဲ့ ပတ်သက်ပြီး ဆုံးဖြတ်နိုင်ခွင့် မရှိတော့ပါဘူး။ အာဆင်နယ် အနေနဲ့ မန်စီးတီးကို အခွင့်အရေး ပေးလိုက်မလား၊ သူတို့ ကိုယ်တိုင်ပဲ ဆက်သွားမလား အရေးကြီးနေပါပြီ” လို့ အွန်နရီက ဆိုပါတယ်။

.
အာဆင်နယ်ဟာ ချန်ပီယံလိဂ် ပြိုင်ပွဲမှာလည်း ဗိုလ်လုပွဲအထိ တက်ရောက်ထားနိုင်ခဲ့ပြီ ဖြစ်တာကြောင့် ဒီရာသီမှာ အဓိက ဆုဖလား ၂ လုံး ဆွတ်ခူးနိုင်ဖို့ လက်တစ်ကမ်းသာ လိုပါတော့တယ်လို့ ပြောရမှာပါပဲ။

.