.
၂၀၂၆ ခုနှစ်၊ မေလ ၆ ရက်
.
ရှမ်းပြည်နယ်တောင်ပိုင်း၊ တောင်ကြီးမြို့နယ်၊
အေးသာယာမြို့တွင် အမျိုးသားတစ်ဦးအား သေဆုံးသည်အထိ ရိုက်နှက်ခဲ့သူများကို ယနေ့ မေလ
၆ ရက်၊ ညနေပိုင်းတွင် ဖမ်းဆီးရမိခဲ့ကြောင်း သိရသည်။
.
အေးသာယာမြို့၊ အမှတ် (၁၀) ရပ်ကွက်ရှိ အုတ်တံတိုင်းကာရံထားသည့်
၆ ကွက်တွဲ ခြံဝင်းတွင် ယနေ့ မေလ ၆ ရက်၊ နံနက် ၉ နာရီခန့်က အမည်မသိ အမျိုးသားတစ်ဦးအား
နောက်စေ့ပေါက်ပြဲ သွေးထွက်ဒဏ်ရာ၊ မျက်နှာပြင် ဖူးရောင်ဒဏ်ရာ၊
နှုတ်ခမ်းကွဲအက်ဒဏ်ရာ၊ လည်ပင်းပြတ်ရှဒဏ်ရာ စိုးရိမ်ရ တို့ဖြင့် သတိလစ်
မေ့မျောနေသည်ကို တွေ့ရှိခဲ့ပြီး တောင်ကြီးမြို့၊ စဝ်စံထွန်းဆေးရုံသို့ ပို့ဆောင်ကာ
ဆေးကုသမှု ခံယူနေစဉ် သေဆုံးသွားခဲ့ခြင်းဖြစ်ကြောင်း သိရသည်။
.
“ရွှေညောင်နဲ့ အေးသာယာအစပ်က ဘုရားဖြူဘုန်းကြီးကျောင်းနားက
တောထဲမှာ ဒီညနေ ၆ နာရီကျော်က မိပါတယ်။ အမျိုးသားတစ်ဦးနဲ့ အမျိုးသမီးတစ်ဦးပါ” ဟု အေးသာယာနယ်မြေရဲစခန်းမှ
တာဝန်ရှိသူက ကမ္ဘောဇတိုင်းသို့ ပြောသည်။
.
ကျူးလွန်သူများမှာ ရန်ပိုင်နှင့်
နှင်းနှင်းဝေတို့ ဖြစ်ပြီး ၎င်းတို့ ၂ ဦးနှင့်အတူ သေဆုံးသူ ဝင်းဌေး ဆိုသူတို့ ၃
ဦးသည် ယမန်နေ့ မေလ ၅ ရက်၊ ည ၁၁ နာရီခန့်က အခင်းဖြစ်နေရာတွင် အရက်အတူသောက်နေစဉ်
သေဆုံးသူမှ မိန်းကလေးအား မဖွယ်မရာ ကြံစည်သည့်အတွက် ဝိုင်းဝန်းရိုက်နှက်ခဲ့ခြင်း
ဖြစ်သည်ဟု တရားခံများက ထွက်ဆိုထားကြောင်း သိရသည်။
.
အဆိုပါ အမျိုးသား သေဆုံးမှုနှင့် ပတ်သက်၍ ကျူးလွန်သူ
ရန်ပိုင်နှင့် နှင်းနှင်းဝေတို့ ၂ ဦးအား အေးသာယာနယ်မြေရဲစခန်းတွင် ရာဇသတ်ကြီး ပုဒ်မ
၃၀၂ ဖြင့် အမှုဖွင့်စစ်ဆေး ဆောင်ရွက်လျက်ရှိကြောင်း သိရသည်။
.
No comments:
Post a Comment