အေးသာယာတွင် တစ်ညထဲ ဖုန်းဆိုင် နှစ်ဆိုင် ဖောက်ထွင်းခိုးယူခံရ

.

၂၀၂၆ ခုနှစ်၊ မေလ ၁၂ ရက်

.

ရှမ်းပြည်နယ်တောင်ပိုင်း၊ တောင်ကြီးမြို့နယ်၊ အေးသာယာမြို့တွင် ယမန်နေ့ မေလ ၁၁ ရက်၊ ညပိုင်းက ဖုန်းဆိုင် ၂ ဆိုင် ဖောက်ထွင်းခိုးယူခံရမှု ဖြစ်ပွားခဲ့ကြောင်း သိရသည်။

.

.

“မနေ့ညက ၁၁ နာရီခွဲလောက်မှာ ကောင်လေး ၂ ယောက် လာတယ်လို့ ဆိုင်ခန်းပိုင်ရှင်က ပြောပါတယ်။ ပုံမှန် ဆိုရင်လည်း ကျွန်တော်တို့က တောင်ကြီးက ပြန်ရောက်ပြီး ည ၉ နာရီ၊ ၁၀ နာရီ လောက်မှ အားသွင်း ကြိုးတွေ ဝင်ယူတာမျိုးရှိတတ်တော့ ကျွန်တော်တို့ပဲထင်ပြီး မပြောလိုက်တာတဲ့။ ဖုန်း ၄ လုံး ပါသွားပါတယ်။ ခိုးတဲ့ ကောင်လေးတွေက အသက် ငယ်ငယ်လေးတွေ၊ ပုံမှန်ဆိုရင် ကားကွင်းနားမှာ ပိုက်ဆံ လိုက်တောင်း နေတဲ့သူတွေလို့ သိရပါတယ်။ အမှုတော့ မဖွင့်ရသေးပါဘူး” ဟု ဖောက်ထွင်းခိုးယူခံရသည့် ဖုန်းဆိုင်ပိုင်ရှင် တစ်ဦးက ကမ္ဘောဇတိုင်းသို့ ပြောသည်။

.

အဆိုပါ ဖုန်းဆိုင်မှ iPhone 7 တစ်လုံး၊ 8 တစ်လုံး၊ 10 တစ်လုံးနှင့် 10X တစ်လုံး စုစုပေါင်း ဖုန်း ၄ လုံး ခိုးယူခံခဲ့ရပြီး အေးသာယာဈေးရှေ့ရှိ ဖုန်းဆိုင်တစ်ဆိုင်တွင်လည်း ယမန်နေ့ညကပင် ဖောက်ထွင်းခိုးယူခံရမှု ဖြစ်ပွားခဲ့ကာ Computer တစ်လုံး ခိုးယူခံခဲ့ရသည်ဟု သိရသည်။

.

ခိုးယူခံရသည့် ဖုန်း ၄ လုံးအနက် ၂ လုံးမှာ ဖောက်သည်များမှ ပြင်ဆင်ရန် လာရောက်အပ်နှံထားသည့် ဖုန်းများ ဖြစ်ပြီး စုစုပေါင်း ဖုန်း ၄ လုံး၏တန်ဖိုး ကျပ် ၈ သိန်းဝန်းကျင်ခန့် ရှိသည်ဟု သိရသည်။

.

အေးသာယာ အပါအဝင် တောင်ကြီးမြို့နယ်အတွင်း ဆိုင်ကယ်ခိုးမှု၊ လုယက်မှုနှင့် ဒုစရိုက်မှုများ မကြာခဏ ဖြစ်ပွားနေပြီး ဆိုင်ကယ်ခိုးယူခံရမှု အများစုမှာ ပြန်လည်ရရှိခြင်း မရှိကြောင်း သိရသည်။

.