ပိုက်ဆံမပေးဘဲ ဓာတ်ပုံတွေသုံးလို့ဆိုပြီး Samsung ကို ဒူအာလီပါ တရားစွဲ

.

၂၀၂၆ ခုနှစ်၊ မေလ ၁၂ ရက်

.

ကမ္ဘာကျော် ပေါ့ပ်အဆိုတော် ဒူအာ လီပါ ကတော့ တောင်ကိုရီးယားနည်းပညာကုမ္ပဏီဖြစ်တဲ့ Samsung ကို တရားစွဲလိုက်ပါပြီ။ အကြောင်းကတော့ သူမရဲ့ ဓာတ်ပုံတွေကို ခွင့်ပြုချက်မရှိဘဲ အသုံးပြုခဲ့တယ် ဆိုတာကြောင့်ပါပဲ။

.

.

အမေရိကန် တရားရုံးမှာ တရားစွဲထားတာဖြစ်ပြီး လျော်ကြေးအဖြစ် ဒေါ်လာ ၁၅ သန်း တောင်းထားပါတယ်။

.

တရားစွဲမှုအရ အမေရိကန် တစ်နိုင်ငံလုံးမှာ ရောင်းချနေတဲ့ Samsung ရဲ့ တီဗီ ဘူးခွံတွေမှာ ဒူအာလီပါ ရဲ့ ဓာတ်ပုံတွေကို အသုံးပြုထားတယ်လို့ဆိုပါတယ်။ ဒီအမှုကို ကယ်လီဖိုးနီးယားမှာရှိတဲ့ တရားရုံးမှာ တင်သွင်း ခဲ့တာပါ။

.

အသက် ၃၀ နှစ်ရှိပြီဖြစ်တဲ့ ဒူအာလီပါက ဂရမ်မီဆုရှင် အဆိုတော်ဖြစ်ပြီး “Don’t Start Now” “Levitating” “Physical” သီချင်းတွေနဲ့ ကမ္ဘာကျော်အဆိုတော် ဖြစ်လာတဲ့သူပါ။ သူမက Puma ၊ Yves Saint Laurent ၊ Versace တို့လို ကုမ္ပဏီကြီးတွေနဲ့ ကြော်ငြာစာချူပ်တွေ ချုပ်ဆိုထားသူလည်း ဖြစ်ပါတယ်။

.

တရားရုံးမှာတင်ပြထားတဲ့ စာအရတော့ လီပါ က Samsung ကို သူမရဲ့ဓာတ်ပုံအသုံးပြုခွင့်နဲ့ ပတ်သက်လို့ သဘောတူညီမှု တစ်စုံတစ်ရာ မရှိခဲ့ဘူးလို့ ပါပါတယ်။ ဒါပေမယ့် တီဗီဗူးတွေမှာ အသုံးပြုထားတဲ့ ပုံစံက သူမနဲ့ဆမ်ဆောင်းတို့ ပူးပေါင်းလုပ်ဆောင်ထားသလိုဖြစ်နေပြီး မှားယွင်းတဲ့ဆက်စပ်မှု ဖြစ်အောင် Samsung က အသုံးချထားတာဖြစ်တယ်လို့ စွပ်စွဲထားတာပါ။

.

ဒူအာလီပါ က သူမရဲ့နာမည်၊ ပုံရိပ်တွေအပေါ်မှာ တန်ဖိုးကြီးတဲ့ မူပိုင်ခွင့်နဲ့ အသုံးပြုခွင့်တွေ ပိုင်ဆိုင်ထားပြီး တရားစွဲမှု မတိုင်ခင်ကတည်းက လီပါ ရဲ့ရှေ့နေတွေက ဒီပုံတွေကို မသုံးဖို့အတွက် Samsung ကို အကြိမ်ကြိမ်စာပို့ခဲ့တယ်လို့လည်း သိရပါတယ်။

.

ဒူအာလီပါ ဖက်က ဒီတရားစွဲမှုမှာ လျော်ကြေးအဖြစ် အနည်းဆုံး ဒေါ်လာ ၁၅ သန်း တောင်းထားပြီး Samsung ဖက်ကတော့ တုန့်ပြန်ချက် တစ်စုံတစ်ရာ ပေါ်ထွက်မလာသေးပါဘူး။

.