ဟဲဟိုးမြို့၊ အင်းခေါင်း ရွာတော်ကျေးရွာ၊ မိုင်းလင်းစေတီ ဘုရားပွဲတွင် လောင်းကစားဝိုင်းများ ထည့်သွင်းပြုလုပ်နေ

.

၂၀၂၆ ခုနှစ်၊ မေလ ၈ ရက်

.

ရှမ်းပြည်နယ်တောင်ပိုင်း၊ ကလောမြို့နယ်၊ ဟဲဟိုးမြို့၊ အင်းခေါင်း ရွာတော်ကျေးရွာရှိ မိုင်းလင်းစေတီ ဘုရားပွဲတွင် လောင်းကစားဝိုင်းများ ထည့်သွင်းကျင်းပနေကြောင်း ဒေသခံများထံက သိရသည်။

.

.

နှစ်စဉ်ကျင်းပမြဲဖြစ်သော မိုင်းလင်းစေတီ ဘုရားပွဲကို မေလ ၈ ရက်မှ ၉ ရက်အထိ ၂ ရက်ကြာ ကျင်းပ ပြုလုပ်နေခြင်းဖြစ်ပြီး ပွဲတော်အတွင်း ဂုံးဂင်းဝိုင်း ၂၀၊ ဂျင်ဝိုင်း ၃ ဝိုင်း၊ ရှမ်းကိုးမီး ၇ ခုံ ပါဝင်ကာ ပွဲတော် ၂ ရက်စာအတွက် တစ်ခုံလျှင် ၈ သိန်းနှုန်းဖြင့် ပွဲကန်ထရိုက်ထံ ပေးသွင်းရကြောင်း သိရသည်။

.

“ဟဲဟိုး အင်းခေါင်းက ဒေါ်ငယ်တို့ဝိုင်းမှာ ဂျင်ဝိုင်း လုပ်နေတာပါ။ သူက ဂျင်ဝိုင်း ဒိုင်အုပ်ပါ။ နေပြည်တော်က ဒိုင်တွေ၊ ကစားတဲ့သူတွေလည်း အများကြီးပဲ။ သိန်းပေါင်း ထောင်နဲ့ သောင်းနဲ့ချီပြီး ဆော့နေကြတာပါ။ သူတို့လုပ်နေတာ ကြာပါပြီ။ ဒါကို တားမြစ်၊ အရေးယူပေး စေချင်ပါတယ်” ဟု ဒေသခံတစ်ဦးက ကမ္ဘောဇတိုင်း သို့ ပြောသည်။

.

အင်းခေါင်းဒေသတွင် ယင်းကဲ့သို့ လောင်းကစားဝိုင်းများကို ၂၀၂၁ ခုနှစ် နောက်ပိုင်းကတည်းက အမြဲမပြတ် ပြုလုပ်နေခြင်းဖြစ်ပြီး ယခုတွင် ဘုရားပွဲကိုအကြောင်းပြ၍ အကြီးအကျယ် ပြုလုပ်ခြင်းဖြစ်ကာ ဒိုင်အုပ် ဒေါ်ငယ် ဆိုသူမှ ဌာနဆိုင်ရာများကို ငွေပေး၍ ပြုလုပ်နေခြင်းဖြစ်သည်ဟု ၎င်းကိုယ်တိုင်က ဝန်ခံ ပြောဆိုထားသည်။ ငွေကြေး မည်မျှ ပေးရသည်ကိုမူ ပြောဆိုရန် ငြင်းပယ်ခဲ့သည်။

.

“ဒေသခံ ကစားတဲ့သူတွေက (ငွေကြေး) ရှိတဲ့သူကတော့ အကြောင်းမဟုတ်ဘူးပေါ့။ မရှိတဲ့သူတွေကျတော့ မိသားစုတွေ ဒုက္ခရောက်တယ်။ ယောက်ျားတွေက ရှိတာတွေပေါင်မယ်။ ဆိုင်ကယ်တွေပေါင်၊ ကားတွေပေါင်၊ မြေကွက်တွေပေါင်၊ မိန်းမက သဘောမတူရင် မိန်းမကို ရိုက်မယ်၊ ပြဿနာရှာမယ်။ မိသားစုတွေ စိတ်ဆင်းရဲ ရတာပေါ့” ဟု အခြား ဒေသခံတစ်ဦးကလည်း ပြောဆိုခဲ့သည်။

.

အဆိုပါကိစ္စနှင့် ပတ်သက်၍ ဟဲဟိုးနယ်မြေရဲစခန်းမှ တာဝန်ရှိသူအား ကမ္ဘောဇတိုင်းမှ ဆက်သွယ်မေးမြန်း ရာတွင် “ဘုရားပွဲရှိတာတော့ သိပါတယ်။ လောင်းကစား ခွင့်ပြုထားတာတော့ မရှိဘူး။ စုံစမ်းလိုက်ပါမယ်” ဟု ပြန်လည်ဖြေကြားခဲ့သည်။

.

ရှမ်းပြည်နယ်အတွင်းရှိ မြို့နယ်ဒေသအချို့တွင် ပွဲလမ်းသဘင် အမျိုးမျိုးကို အကြောင်းပြ၍ လောင်းကစား ဝိုင်းများကို ထည့်သွင်းပြုလုပ်မှုများ ရှိနေကြောင်း သိရသည်။

.