ရပ်စောက်တွင် အမျိုးသမီးများအား ပစ်မှတ်ထားကာ လိုက်လံလုယက်နေသူကို ဖမ်းမိ

.

၂၀၂၆ ခုနှစ်၊ မေလ ၅ ရက်

.

ရှမ်းပြည်နယ်တောင်ပိုင်း၊ ရပ်စောက်မြို့နယ်တွင် အမျိုးသမီးများအား ပစ်မှတ်ထားကာ မကြာခဏ လိုက်လံ လုယက်နေသူတစ်ဦးကို မေလ ၁ ရက်က ဖမ်းဆီးရမိခဲ့သည်ဟု သိရသည်။

.

.

“ဒီလိုပုံံတူဖြစ်စဉ်မျိုး ၄/၅ ခုလောက် ရှိပါတယ်။ တခြားရွာတွေမှာ ဖြစ်တာ ကြားတာတွေနဲ့ ၁၄/၁၅ ခါထက် မနည်းဘူးထင်တယ်။ သူလုပ်နေတာက ၂ နှစ်နီးပါးရှိပြီ” ဟု ရပ်စောက်မြို့နယ်၊ ရတနာပုံကျေးရွာနေ ဒေသခံ တစ်ဦးက ပြောသည်။

.

ရပ်စောက်မြို့နယ်၊ ပိန္နဲပင်ကျေးရွာနေ အမျိုးသမီးငယ်တစ်ဦးသည် မေလ ၁ ရက်က ဆိုင်ကယ်ဖြင့် ဈေးသို့ သွားစဉ် နောက်မှ ဆိုင်ကယ်တစ်စီး လိုက်လာသည့်အတွက် ကျော်တက်မည်အထင်ဖြင့် ဘေးချပေးရာ နောက်မှ ဆိုင်ကယ်စီးလာသူ အမျိုးသားက သူမဆိုင်ကယ်အား တွန်းကန်လှဲချခဲ့ပြီး ဆိုင်ကယ်လဲသွားစဉ် ပိုက်ဆံအိတ်ကို လုယူသွားခဲ့ခြင်းဖြစ်ကြောင်း သိရသည်။

.

“ဆိုင်ကယ်လဲသွားတဲ့အချိန်မှာ အမေ့ကိုဖုန်းဆက်မယ်ဆိုပြီး ပိုက်ဆံအိတ်ယူလိုက်တဲ့အချိန် အဲဒီလူက ပိုက်ဆံအိတ်ကို လုသွားတာပါ။ ကျွန်မလည်း ရုတ်တရက် ကြောင်ပြီး ကြည့်နေမိတယ်။ သူက ဖြည်းဖြည်းပဲ မောင်းသွားပြီး လှည့်ကြည့်တော့ သူ့မျက်နှာကို မှတ်မိလိုက်တာပါ” ဟု လုယက်ခံရသူ အမျိုးသမီးတစ်ဦးက ပြောသည်။

.

ဆိုင်ကယ်တွန်းလှဲပြီး လုယက်ခံရမှုကြောင့် ယင်းအမျိုးသမီးတွင် ဝဲဘက်ခြမ်း ခြေထောက်နှင့် ရင်ဘတ် တို့တွင် ထိခိုက်ဒဏ်ရာများ ရရှိခဲ့ကြောင်း သိရသည်။

.

လုယက်မှု ကျူးလွန်သူမှာ ရှိုင်းအောင် ဆိုသူဖြစ်ပြီး ၎င်းကို ယင်းနေ့တွင်ပင် ဖမ်းဆီးရမိခဲ့ကာ ပင်ဖြစ် နယ်မြေရဲစခန်းတွင် ချုပ်နှောင်ထားကြောင်း သိရသည်။

.

အဆိုပါကိစ္စနှင့် ပတ်သက်၍ ရဲတပ်ဖွဲ့ တာဝန်ရှိသူတစ်ဦးက “မေလ ၁ ရက်နေ့မှာ ဖမ်းမိပါတယ်။ တရားလိုက အဲဒီနေ့မှာ ထိခိုက်ဒဏ်ရာတွေကြောင့် သွားလာလို့ မရသေးတဲ့အတွက် အမှု မဖွင့်သေးဘဲ ရပ်စောက်မြို့နယ် တရားသူရုံးမှာ ရမ္မန်ယူပြီး စခန်းမှာ ချုပ်ထားပါတယ်။ ဒီနေ့ (မေလ ၅ ရက်) မှ အမှုဖွင့်တာပါ” ဟု ပြောဆိုခဲ့သည်။

.

ကျူးလွန်သူ ရှိုင်းအောင်သည် ယခု လုယက်မှု အပါအဝင် အခြားလုယက်မှုများစွာ ကျူးလွန်ထားပြီး စစ်ဆေးနေဆဲဖြစ်သည်ဟု သိရသည်။

.