မိုင်းပန်မြို့နယ်တွင် အွန်လိုင်း လိမ်လည်လောင်းကစားမှု ကျူးလွန်သူ ၅၀ ကျော်ကို ဖမ်းမိ

ရှမ်းပြည်နယ် တောင်ပိုင်း၊ မိုင်းပန်မြို့၏ မြောက်ဘက် မီတာ ၁၄၀၀၀ ခန့်အကွာ ကျိုင်းတောင်း-မိုင်းပန်သွား ကားလမ်းအနီး၌ အွန်လိုင်း လိမ်လည်လောင်းကစားမှုကျူးလွန်သူ မြန်မာနိုင်ငံသား ၄ ဦးကို လည်းကောင်း၊ ယင်းနေရာ၏ အရှေ့မြောက်ဘက်မီတာ ၆၀၀၀ ခန့်အကွာတွင် အွန်လိုင်း လိမ်လည်လောင်းကစားမှု ကျူးလွန်သူ တရုတ်နိုင်ငံသား  အမျိုးသား ၅၂ ဦး တို့အား လည်းကောင်း ယမန်နေ့ ဧပြီလ ၄ ရက်တွင် လုံခြုံရေးပူးပေါင်းအဖွဲ့ များက ဖမ်းမိခဲ့ကြောင်း သိရသည်။

.

ထို့အပြင် မိုင်းပန်မြို့၏ မြောက်ဘက် ကျိုင်းတောင်း-မိုင်းပန်သွားကားလမ်း၏ အရှေ့ဘက်မီတာ ၂၀၀၀ ခန့်အကွာ၌ တရားမဝင် အွန်လိုင်းလိမ်လည်လောင်းကစားမှု ကျူးလွန်ရာတွင် အသုံးပြုခဲ့သည့် အဆောက်အအုံများအတွင်း၌ မီးရှို့ဖျက်ဆီးထားသည့် ကွန်ပျူတာများ၊ လောင်းကစားမှု ကျူးလွန်ရာတွင် အသုံးပြုခဲ့သည့် အလုပ်ရုံ ၊ လူနေတဲ ၊ All In One  ၊ Laptop  ၊ Starlink ၊ ပါဝါစတေရှင်၊ မီးစက် နှင့် ဆက်စပ်ပစ္စည်းများအား  သိမ်းဆည်းရမိခဲ့ကြောင်းလည်း သိရသည်။

.

အဆိုပါ အွန်လိုင်း လိမ်လည်လောင်းကစားမှုများ လုပ်ကိုင်လျက်ရှိသည့် ဖမ်းဆီးရမိ သူများအား စစ်ဆေးမှုများ ဆောင်ရွက်ပြီးစီးပါက တည်ဆဲဥပဒေများနှင့်အညီ ထိရောက်စွာ အရေးယူ ဆောင်ရွက်၍ သိမ်းဆည်းရမိသည့် လုပ်ငန်းသုံး ပစ္စည်းများအား လုပ်ထုံးလုပ်နည်းများနှင့်အညီ ဆက်လက်ဆောင်ရွက်သွားမည် ဖြစ်ကြောင်း သိရသည်။

.