သူရဲကောင်းကနေ ဗီလိန်ပြန်ဖြစ်သွားခဲ့တဲ့ မိုင်သီတဲနဲ့ တန်းဆင်းဇုန်အန္တရာယ်ကနေ မလွတ်သေးတဲ့ စပါး

.

၂၀၂၆ ခုနှစ်၊ မေလ ၁၂ ရက်

.

မနေ့ညက ကစားခဲ့တဲ့ စပါးနဲ့ လိဒ်ယူနိုက်တက်အသင်းတို့ရဲ့ ပွဲမှာတော့ ၁-၁ ဆိုတဲ့ရလာဒ်နဲ့ သရေကျသွား ခဲ့ပြီး တန်းဆင်းဇုန်ကနေ ဝေးရာကိုပြေးမယ့် စပါးရဲ့အစီအစဉ်လည်း မအောင်မြင်ဘဲ ဖြစ်သွားခဲ့ပါတယ်။

.

.

ပွဲချိန် ပထမပိုင်းမှာ ၂ ဖက်လုံး ဂိုးတွေ မသွင်းနိုင်ကြပေမဲ့ ဒုတိယပိုင်း ၅၁ မိနစ်မှာတော့ စပါးအတွက် တိုက်စစ်မှုး မိုင်သီတဲ က ဦးဆောင်ဂိုးသွင်းပေးခဲ့တာပါ။

.

လိဒ်ယူနိုက်တက်က အမှတ်မလိုတော့တဲ့အသင်းဖြစ်တာမို့ စပါးအနေနဲ့ ဒီပွဲမှာသာ နိုင်လိုက်ရင် ဝက်စ်ဟမ်း အသင်းကို ၄ မှတ်ဖြတ်ပြီး တန်းဆင်းဇုန်ကနေ လွတ်ရာကိုပြေးဖို့ အခွင့်အရေးရှိနေခဲ့တာပါ။

.

ဒါပေမဲ့လည်း ပွဲချိန် ၇၄ မိနစ်မှာ မိုင်သီတဲ က ဂိုးဧရိယာထဲမှာ ဘောလုံးကို နောက်ပြန်ကန်ပြီး ဖျက်ထုတ် ရာမှာ ပြိုင်ဖက်ခေါင်းကို ကန်မိလို့ ပင်နယ်တီ ပေးခဲ့ရပြီး လိဒ်တိုက်စစ်မှုး ကဲလ်ဘတ်လီဝင်က ကန်သွင်းသွား ခဲ့တာပါ။

.

လီဗာပူးလ်နောက်ခံလူဟောင်း ကာရေဂါကတော့ မိုင်သီတဲ ရဲ့ ဆုံးဖြတ်ချက်ဟာ တကယ့်ကို ရူးကြောင်ကြောင် လုပ်ရပ်ပဲလို့ မှတ်ချက်ပေးလိုက်ပါတယ်။

.

“ဒါကြီးကတော့ တကယ့်ကို ရူးချင်စရာ ဆုံးဖြတ်ချက်ကြီးပါ။ ကိုယ့်ဂိုးစည်းထဲမှာ ဖျက်ထုတ်တာကို နောက်ပြန်ကန်ချက်နဲ့ ဖျက်ထုတ်ဖို့ လိုလားဗျာ။ ပြိုင်ဖက်က ခေါင်းတိုက်မယ်ဆိုတာ သိနေတဲ့ အနေအထား ကြီးကို ကိုယ်က လေထဲမှာ နောက်ပြန်ကန်တယ်ဆိုတာ တော်တော်ဆိုးတဲ့ ဆုံးဖြတ်ချက်ပါပဲ” လို့ ကာရေဂါက ပြောပါတယ်။

.

လက်ရှိမှာတော့ ပရီးမီးယားလိဂ်ရဲ့ တန်းဆင်းဇုန်နေရာ တစ်နေရာအတွက် စပါးနဲ့ ဝက်စ်ဟမ်းတို့က အပြိုင် ဖြစ်နေပြီး အမှတ်ပေးဇယားရပ်တည်မှုမှာ စပါးက ဝက်စ်ဟမ်းထက် ၂ မှတ်သာနေပါတယ်။

.

ပရီးမီးယားလိဂ်ပွဲစဉ်က ၃၆ ကို ရောက်နေပြီမို့ လက်ကျန် ၂ ပွဲသာ ကစားဖို့လိုတော့ပြီး စပါးက ချယ်လ်ဆီး၊ အဲဗာတန်တို့နဲ့ ကစားရမှာမို့ ပွဲကျပ်နေတယ်လို့ပြောရမှာပါ။

.

ဝက်စ်ဟမ်းကတော့ သူတို့ရဲ့လက်ကျန် ၂ ပွဲကို နယူးကာဆယ်၊ လိဒ် တို့နဲ့ ကစားရမှာဖြစ်ပါတယ်။

.