တောင်ကြီးတွင် လိုင်စင် မရှိဘဲ အရက်/ဘီယာ ရောင်းသည့်ဆိုင် အဖမ်းခံရ

၂၀၂၆ ခုနှစ်၊ ဇွန်လ ၂၃ ရက်

.
ရှမ်းပြည်နယ်၊ တောင်ကြီးမြို့၌ ယစ်မျိုးလိုင်စင် မရှိဘဲ အရက်နှင့် ဘီယာများ ရောင်းချနေသည့် ဘားဆိုင် ပိုင်ရှင် ဖြစ်သူ အမျိုးသမီး တစ်ဦး ယမန်နေ့ ဇွန်လ ၂၂ ရက်၊ ညဦးပိုင်းက ဖမ်းဆီးခံခဲ့ရကြောင်း သိရသည်။

.

တောင်ကြီးမြို့မရဲစခန်း၊ အထွေထွေအုပ်ချုပ်ရေးဦးစီးဌာန၊ အခွန်ဦးစီးဌာန၊ စည်ပင်သာယာရေးဌာနမှ ဝန်ထမ်းများ ပါဝင်သော ပူးပေါင်းအဖွဲ့သည် သက်သေများနှင့်အတူ တောင်ကြီးမြို့၊ ကန်ရှေ့ရပ်ကွက်၊ မဟာသုခလမ်းသွယ်ရှိ ဘားဆိုင်၌ တရားမဝင်လိုင်စင်မဲ့ အရက်နှင့် ဘီယာများ ရောင်းချနေသည်ဟူသော သတင်းအရ သွားရောက် စစ်ဆေးစဉ် ယစ်မျိုးလိုင်စင် မရှိဘဲ အရက်နှင့် ဘီယာများ ရောင်းချနေမှုကို တွေ့ရှိခဲ့ခြင်း ဖြစ်သည်။

.

ယစ်မျိုးလိုင်စင် မရှိဘဲ အရက်နှင့် ဘီယာများ ရောင်းချနေသည့် အမျိုးသမီးမှာ “ဂေ့” food & drink ဆိုင် ပိုင်ရှင် ဖြစ်ပြီး ၎င်းနှင့်အတူ Mandalay Run၊ Tiger Lager Beer၊ Myanmar Premium၊ ABC Extra Stout တို့ကိုပါ ဖမ်းမိခဲ့ခြင်း ဖြစ်ကာ တောင်ကြီးမြို့မရဲစခန်း၌ အမှုဖွင့် အရေးယူထားကြောင်း သိရသည်။

.

တောင်ကြီးမြို့နယ် အတွင်း၌ KTV နှင့် Bar များ အပြိုင်အဆိုင် ပေါများလာနေလျက်ရှိရာ ယင်း စည်းကမ်းမဲ့ ဆိုင် အချို့ကြောင့် လူငယ်များ ပျက်စီးလာမည်ကို မိဘများက စိုးရိမ်နေလျက်ရှိသည်။

.