အပြောင်းအရွှေ့ နောက်ဆုံးနေ့မှာ နိုင်ငံခြားကစားသမား ၃ ဦး ခေါ်ပြလိုက်တဲ့ ရှမ်း အမျိုးသမီးအသင်း

၂၀၂၆ ခုနှစ်၊ ဇွန်လ ၂၁ ရက်

.
ဒီရာသီမှာ နိုင်ငံခြားကစားသမား တစ်ယောက်မှ အား မဖြည့်ထားတာကြောင့် ပရိသတ်တွေရဲ့ ဝေဖန်မှုတွေကို ခံနေရတဲ့ ရှမ်းယူနိုက်တက် အမျိုးသမီးအသင်းကတော့ အပြောင်းအရွှေ့ နောက်ဆုံးနေ့မှာမှ နိုင်ငံခြား ကစားသမား ၃ ဦးကို တပြိုင်တည်း ခေါ်ပြီး ပရိသတ်တွေကို အံ့အားသင့်အောင် လုပ်ပြသွားခဲ့ပါတယ်။
.
ဒီရာသီ နိုင်ငံခြားကစားသမား အပြောင်းအရွှေ့ကို ဧရာဝတီ၊ ဇွဲကပင်နဲ့ ရတနာပုံ အသင်းတို့ကသာ လုပ်ထားကြပြီး အမျိုးသမီးလိဂ်ရဲ့ အင်အားကြီး အသင်း တစ်သင်းဖြစ်တဲ့ ရှမ်းယူနိုက်တက်တို့ ငြိမ်သက်နေခဲ့တာကြောင့် ပရိသတ်တွေ အားမလို အားမရ ဖြစ်ခဲ့ကြရတာပါ။
.
အပြောင်းအရွှေ့ နောက်ဆုံးနေ့မှာ ဂါနာလက်ရွေးစင် အမျိုးသမီးအသင်းရဲ့ တိုက်စစ်နဲ့ တောင်ပံကစားသမား ၂ ယောက်အပြင်၊ ဘူရွန်ဒီ အမျိုးသမီးလက်ရွေးစင်အသင်းရဲ့ အသင်းခေါင်းဆောင်ကိုပါ ခေါ်ပြလိုက်ပြီး ဒီရာသီမှာ ကြမ်းတော့မယ့် အကြောင်းကို ရှမ်းယူနိုက်တက်က အသိပေးလိုက်တာပါ။
.
ရှမ်းယူနိုက်တက်အမျိုးသမီးအသင်း ခေါ်ယူခဲ့တဲ့ ကစားသမား ၃ ယောက်ကတော့
■ ဒါကို သရီဆာ (ကွင်းလယ်)
ဂါနာလက်ရွေးစင် အမျိုးသမီးအသင်းရဲ့ ယူ ၁၇ နဲ့ ယူ ၂၀ အသင်းတွေမှာ ရွေးချယ်ခံခဲ့ရတဲ့သူ ဖြစ်ပြီး တိုက်စစ်ကို လိုက်ပါ ဂိုးသွင်းနိုင်တဲ့ ကွင်းလယ်လူ တစ်ယောက်လည်း ဖြစ်ပါတယ်။
■ အဘီဂေးလ် ဆာကြည်ဝါ (တောင်ပံ၊တိုက်စစ်)
ဂါနာရဲ့ ယူ ၁၅၊ ယူ ၁၇ ၊ ယူ ၂၀ လက်ရွေးစင် အသင်းတွေမှာ ကစားခဲ့တဲ့အပြင် ဂါနာနိုင်ငံတွင်းက အမျိုးသမီး ပရီးမီးယားလိဂ် ချန်ပီယံဆုကိုပါ ရရှိခဲ့ဖူးတဲ့ တိုက်စစ် ကစားသမားပါ။ အီဂျစ်ရဲ့ နာမည်ကြီးကလပ်ဖြစ်တဲ့ ဇာမာလက် အသင်းမှာ ကစားခဲ့ဖူးသူ ဖြစ်ပြီး တောင်ပံမှာရော၊ အထောင်တိုက်စစ်မှူး အနေနဲ့ရော ကစားနိုင်တဲ့သူပါ။
■ ပိစ် အိုလ်ဂါ နီယိုဝမ်ဂီရီ (ကွင်းလယ်)
ဘူရွန်ဒီအမျိုးသမီး လက်ရွေးစင်အသင်းရဲ့ လက်ရှိ အသင်းခေါင်းဆောင် ဖြစ်ပြီး ၂၀၁၆ ခုနှစ်ကတည်းက နိုင်ငံအသင်းအတွက် ရွေးချယ်ခံထားရသူပါ။ နိုင်ငံအသင်း သွင်းဂိုး ၉ ဂိုး ရရှိထားသူ ဖြစ်ပြီး အာဖရိက အမျိုးသမီး ချန်ပီယံရှစ်မှာရော၊ ကမ္ဘာ့ဖလားမှာပါ ခြေစစ်ပွဲ ကစားဖူးတဲ့ အတွေ့အကြုံ ရှိထားတာမို့ အားကိုးရတဲ့ ကွင်းလယ်လူ ဖြစ်လာဖို့ ရှိနေတာပါ။
.
လက်ရှိမှာတော့ ဒီကစားသမားတွေက အသင်းဆီ ရောက်မလာသေးပေမယ့် အမြန်ဆုံး လာရောက် ပူးပေါင်းနိုင်ဖို့ ရှမ်းယူနိုက်တက်ဖက်က စီစဉ်နေပြီး လာမယ့်တစ်ပတ် ပွဲစဉ်အမီ မြင်တွေ့ရဖို့လည်း ရှိနေတာ ဖြစ်ပါတယ်။