ကမ္ဘာ့ဖလားမှာ လက်စွမ်းပြနေပေမဲ့လည်း လက်ရှိမှာ အလုပ်လက်မဲ့ဖြစ်နေကြောင်း ဗိုဇင်ဟာ ရင်ဖွင့်

.

၂၀၂၆ ခုနှစ်၊ ဇွန်လ ၂၈ ရက်

.

ကမ္ဘာ့ဖလားပြိုင်ပွဲမှာ အသင်းအတွက် ရလဒ်ကောင်းတွေ ရယူပေးနေပြီး ရှုံးထွက်အဆင့်ကို တိုက်ရိုက် တက်လာခဲ့ပေမဲ့လည်း လက်ရှိမှာတော့ ခေါ်ယူတဲ့အသင်းမရှိဘဲ အလုပ်လက်မဲ့ဖြစ်နေရတဲ့အကြောင်း ကိပ်ဗာဒီ ဂိုးသမား ဗိုဇင်ဟာက ရင်ဖွင့်ပါတယ်။

.

.

အသက် ၄၀ အရွယ်ဂိုးသမား ဗိုဇင်ဟာ က ပြီးခဲ့တဲ့ နှစ်ရာသီမှာ ပေါ်တူဂီကလပ် ချာဗက်စ်မှာ ကစားခဲ့တာ ဖြစ်ပြီး လက်ရှိအချိန်မှာတော့ စာချုပ်သက်တမ်းကုန်ဆုံးသွားတာကြောင့် အသင်းနဲ့ လမ်းခွဲခဲ့ရတာပါ။

.

ဘရာဇီးသတင်းထောက် ဒါနီယယ်နဲ့ အင်တာဗျူးမှာ ဗိုဇင်ဟာ က “ကျွန်တော့်ရဲ့အရင်ကလပ် ဒီပို့တီပို ချာဗက်နဲ့ စာချုပ်ပြီးဆုံးသွားပါပြီ။ အခုအချိန်မှာတော့ အသင်းသစ်မရသေးပါဘူး။ ကျွန်တော့အနေနဲ့ ဘယ်အခွင့်အရေးကိုမဆို လက်ခံဖို့အသင့်ရှိပါတယ်။ ဘာတွေ ပေါ်လာမလဲဆိုတာ စောင့်ကြည့်ရမှာပေါ့” လို့ပြောဆိုသွားခဲ့တာပါ။

.

ဗိုဇင်ဟာ က ကိပ်ဗာဒီအသင်းရဲ့အဓိက သူရဲကောင်းတစ်ဦးဖြစ်ခဲ့ပြီး အသင်းရဲ့ဂိုးပေါက်ကို အကောင်းဆုံး ကာကွယ်ပေးနိုင်ခဲ့သူလည်း ဖြစ်ပါတယ်။ အသက် ၄၀ အရွယ်ရှိနေပြီဖြစ်ပေမဲ့လည်း သူ့ရဲ့စွမ်းဆောင်ရည် တွေကြောင့် ဗိုဇင်ဟာ ကို ခေါ်ယူချင်တဲ့ ကလပ်အသင်းတွေလည်း ပေါ်ထွက်လာဖို့ရှိနေပါတယ်။

.

ဗိုဇင်ဟာ က ကမ္ဘာ့ဖလားအဖွင့်ပွဲဖြစ်တဲ့ စပိန်အသင်းနဲ့ပွဲမှာ အကောင်းဆုံးလက်စွမ်းပြနိုင်ခဲ့ပြီး နာမည်ကျော် ကစားသမားတွေဖြစ်ကြတဲ့ ယာမယ်နဲ့ နီကိုဝီလီယံ တို့တောင် သူ့ကိုကျော်ဖြတ်နိုင်ခြင်း မရှိခဲ့တာပါ။ ဒါ့အပြင် ဆိုရှယ်မီဒီယာမှာလည်း နာမည်ကြီးသူတစ်ယောက်ဖြစ်လာခဲ့ပြီး ပရိသတ် ၁ သန်းကျော်အထိ ရရှိခဲ့ပါတယ်။

.

ဆော်ဒီနဲ့ ဂိုးမရှိသရေကျတဲ့ ပွဲစဉ်အပြီးမှာတော့ ဗိုဇင်ဟာ က အုပ်စုတွင်း ၃ ပွဲကစားပြီး ပေးဂိုးမရှိပွဲစဉ် ၂ ပွဲကို ရယူနိုင်ခဲ့တဲ့ ဂိုးသမားစာရင်းထဲမှာလည်း ပါဝင်လာခဲ့ပါတယ်။

.

Source – TheSun

.