အပစ်ရပ်စာချုပ်ကို ဘေးချိတ်ပြီး အမေရိကန်နဲ့ အီရန်တို့ ပစ်ခတ်မှုတွေ ပြန်လည်စတင်

.

၂၀၂၆ ခုနှစ်၊ ဇွန်လ ၂၈ ရက်

.

အီရန်ဖက်က ပနားမားအလံတင် သင်္ဘောတစ်စီးကို ဒရုန်းတိုက်ခိုက်မှု ဆက်လက်လုပ်ပြီးတဲ့နောက် အမေရိကန် ကလည်း အီရန်နိုင်ငံအတွင်းက ပစ်မှတ်တွေကို လေကြောင်းတိုက်ခိုက်မှုတွေ ဆက်တိုက် လုပ်ခဲ့လို့ တင်းမာမှုတွေ ပြန်လည်စတင်လာကြပြန်ပါပြီ။

.

.

ဇွန်လ ၂၇ ရက်၊ စနေနေ့မှာ ပြုလုပ်ခဲ့တဲ့ အီရန်ရဲ့ဒရုန်းတိုက်ခိုက်မှု ပြီးတဲ့နောက် အမေရိကန်ဖက်က တိုက်ခိုက်မှုတွေကို ချက်ချင်းပြုလုပ်ခဲ့တာဖြစ်ပြီး အပစ်ရပ်သဘောတူညီချက်ကို ချိုးဖောက်တယ်လို့ အပြန်အလှန်စွပ်စွဲမှုတွေ ပြုလုပ်နေကြတာပါ။

.

အမေရိကန် လေကြောင်းဌာနချုပ်က ကုန်သွယ်သင်္ဘော လမ်းကြောင်းအပေါ် အီရန်ရဲ့ တိုက်ခိုက်မှုတွေကို တုံ့ပြန်တဲ့အနေနဲ့ အီရန်နိုင်ငံအတွင်းမှာရှိတဲ့ စစ်ပစ္စည်းသိုလှောင်ရုံတွေ၊ ဆက်သွယ်ရေးစနစ်တွေ၊ လေကြောင်းကာကွယ်ရေး နေရာတွေနဲ့ ဒရုန်းသိုလှောင်တဲ့ နေရာတွေကို တိုက်ခိုက်ခဲ့တဲ့အကြောင်း ထုတ်ပြန်ထားပါတယ်။

.

အီရန်ဖက်လည်း အပြန်အလှန်အနေနဲ့ ကူဝိတ်နဲ့ ဘာရိန်းမှာရှိတဲ့ အမေရိကန်ရဲ့ အခြေစိုက်စခန်းတွေကို ဒုံးကျည်တွေ၊ ဒရုန်းတွေနဲ့ ပစ်ခတ်ခဲ့တဲ့အကြောင်း နိုင်ငံပိုင်မီဒီယာမှာ ထုတ်ပြန်ခဲ့တာပါ။

.

အီရန်ဖက်က ထိုင်ဝမ်ပိုင်သင်္ဘောကို ဒရုန်းနဲ့ပစ်ခတ်မှု ပြုလုပ်ခဲ့ပြီး နောက်တစ်ရက်မှာ ပနားမားသင်္ဘောကို တိုက်ခိုက်မှု ထပ်မံပြုလုပ်ခဲ့တာပါ။ အီရန်ရဲ့ထုတ်ပြန်ချက်အရတော့ ရေကြောင်းစည်းမျဉ်းတွေ မလိုက်နာတဲ့ သင်္ဘောတွေကို ပစ်ခတ်မှု ပြုလုပ်သတိပေးခဲ့တာ ဖြစ်ပြီး အဲဒီကိစ္စကြောင့် အမေရိကန်ဖက်က အီရန်ရဲ့ စစ်ရေးစခန်း ၅ ခုကို တိုက်ခိုက်ခဲ့တယ်လို့ ပါရှိပါတယ်။

.

ဒါ့အပြင် အမေရိကန်ရဲ့တိုက်ခိုက်မှုကို လက်တုံ့ပြန်တဲ့အနေနဲ့ ကူဝိတ်မှာရှိတဲ့ အလီ အယ်လ်ဆာလမ် စခန်းနဲ့ ဘာရိန်းမှာရှိတဲ့ ပေါ့တ်ဆယ်လ်မန် ရေတပ်စခန်းက အရေးကြီးတဲ့ အဆောက်အအုံ ၈ လုံးကို ဒုံးကျည်တွေ၊ ဒရုန်းတွေနဲ့ တိုက်ခိုက်ဖျက်ဆီးခဲ့တယ် လို့လည်း ပြောဆိုထားပါသေးတယ်။

.

ဒီလအစောပိုင်းမှာ လက်မှတ်ရေးထိုးထားတဲ့ သဘောတူညီချက်အရတော့ အီရန်က ဟောမုဇ်ရေလက်ကြား မှာ သင်္ဘောတွေရဲ့သွားလာရေးကို ပိုမိုထိန်းချုပ်နိုင်ဖို့ စီစဉ်ထားပြီး စည်းကမ်းချိုးဖောက်တဲ့ သင်္ဘောတွေကို တင်းကြပ်စွာ ကိုင်တွယ်မယ်လို့ ထုတ်ပြန်ထားတာပါ။

.

အမေရိကန်ရဲ့နောက်ဆုံးတိုက်ခိုက်မှု မပြုလုပ်ခင်အချိန်မှာ ထရမ့်က သူ့ရဲ့ဆိုရှယ်မီဒီယာကနေ “အီရန်က သင်ခန်းစာမယူနိုင်ဘူး” ဆိုတဲ့အကြောင်း ပို့စ်တင်သွားခဲ့ပါတယ်။

.

“အမေရိကန်က သည်းခံနိုင်တဲ့အခြေအနေ ကုန်ဆုံးသွားပြီဆိုရင် စစ်ရေးအရ ဆောင်ရွက်စရာရှိတာတွေကို အောင်မြင်အောင် လုပ်သွားမှာပါ။ အဲဒီအချိန်ကျရင် အီရန်နိုင်ငံဆိုတာလည်း ရှိတော့မှာမဟုတ်ဘူး” လို့ ထရမ့်က သူ့ရဲ့ဆိုရှယ်မီဒီယာမှာ ရေးသားသွားတာဖြစ်ပါတယ်။

.

အမေရိကန်ရဲ့ လေကြောင်းတိုက်ခိုက်မှုတွေ အပြီးမှာ ကူဝိတ်နဲ့ဘာရိန်းနိုင်ငံတွေက သူတို့ရဲ့ လေကြောင်း ကာကွယ်ရေး စနစ်တွေကို စတင်အသုံးပြုခဲ့ပြီး နိုင်ငံတွင်းမှာ လေကြောင်းအချက်ပေးမှု တွေကိုလည်း ပြုလုပ်ခဲ့ကြရတာပါ။

.

အမေရိကန်နဲ့အီရန်တို့ရဲ့ ဇွန်လ ၁၇ မှာ လက်မှတ်ထိုးခဲ့တဲ့ သဘောတူညီချက်မှာတော့ တိုက်ခိုက်မှုတွေကို ရပ်ဆိုင်းဖို့ သဘောတူညီခဲ့ပြီး ကုန်တင်သင်္ဘောတွေကို ရက် ၆၀ အထိ လုံခြုံစွာသွားလာနိုင်ဖို့ အီရန်က ခွင့်ပြုပေးရမယ်လို့လည်း ပါရှိပါတယ်။

.

Source – BBC

.