အင်းလေးဒေသတွင် ဝက်သေဆုံးမှုများ ရှိနေသော်လည်း စိုးရိမ်ဖွယ်မရှိ ဟုဆို

.

၂၀၂၆ ခုနှစ်၊ ဇွန်လ ၁၉ ရက်

.

ရှမ်းပြည်နယ်တောင်ပိုင်း၊ ညောင်ရွှေမြို့နယ်၊ အင်းလေးကန်ဒေသအတွင်း၌ ဝက်သေဆုံးမှုများ ရှိနေသော် လည်း စိုးရိမ်ဖွယ်ရာမရှိကြောင်း မွေးမြူရေးနှင့် ကုသရေးဦးစီးဌာနထံမှ သိရသည်။

.

.

“ပြည်နယ်မှူးကိုယ်တိုင် ကွင်းဆင်းနေတယ်။ တွေ့ရှိတဲ့ အနေအထားကတော့ အဲဒီလောက် သေတာလည်း မဟုတ်ဘူး။ သို့သော် ရာသီဥတု အကူးအပြောင်းကြောင့် ရှိချင် ရှိမှာပေါ့။ ဌာနကတော့ ပညာပေးဟောပြောပွဲ တွေ၊ လိုအပ်တဲ့ ဇီဝလုံခြုံမှုနဲ့ ပတ်သက်ပြီး သိရှိအောင် ဆောင်ရွက်နေတာ ရှိပါတယ်” ဟု တာဝန်ရှိသူ တစ်ဦး က ပြောသည်။

.

ဝက်သေဆုံးမှုများမှာ အများအပြားသေဆုံးခြင်း မဟုတ်ဘဲ ပုံမှန် ဖြစ်ရိုးဖြစ်စဉ် နေမကောင်း မကျန်းမာ၍ သေဆုံးခြင်းသာဖြစ်ပြီး သေဆုံးဝက်များကိုမူ စနစ်တကျ မြှုပ်နှံရန် လိုအပ်ကြောင်း ၎င်းက ဆက်လက် ပြောဆိုခဲ့သည်။

.

ညောင်ရွှေမြို့နယ်၊ အင်းလေးဒေသ၊ မင်းချောင်းကျေးရွာနေ အမျိုးသားတစ်ဦးကလည်း “ဈေးတွေမှာလည်း ဝက်သား ရောင်းချသူလည်းရှိတယ်၊ ဝယ်သူလည်းရှိတယ်။ ဆိုးဆိုးရွားရွား ကျန်းမာရေးဌာန ကနေ တားရ လောက်တဲ့အဆင့်အထိ မဖြစ်လို့ ညောင်ရွှေစာပြန်ပွဲမှာလည်း ဝက်သားနဲ့ စီစဉ်ထားပါတယ်” ဟု ပြောဆို ခဲ့သည်။

.

ညောင်ရွှေစာပြန်ပွဲအတွက် အသားချက်ပြုတ်ရာတွင်လည်း သန့်ရှင်းလတ်ဆတ်မှုနှင့် အများပြည်သူ စားသုံးရန် သင့်လျော်မှု ရှိ/မရှိကို မွေးမြူရေးနှင့် ကုသရေးဦးစီးဌာနက ကြီးကြပ်ပြီး နေ့စဉ် ဓါတ်ခွဲစမ်းသပ်မှု ပြုလုပ်ပေးသွားမည်ဖြစ်ကြောင်း သိရသည်။

.

ထို့အပြင် မြို့နယ်အသီးသီးရှိ မွေးမြူရေးနှင့် ကုသရေးဦးစီးဌာနများအနေဖြင့် သက်ဆိုင်ရာ မြို့နယ်အလိုက် အသားသန့်ရှင်‌ရေးနှင့် ကျန်းမာလတ်ဆတ်သော အသားရရှိရေးအတွက် ကြပ်မတ်ဆောင်ရွက်ပေးနေခြင်း ဖြစ်ကြောင်း သိရသည်။

.