အမေရိကန်-အီရန် တိုက်ခိုက်မှုတွေကြောင့် ကမ္ဘာ့ရေနံဈေးတွေ ပြန်ခုန်တက်လာ

.

၂၀၂၆ ခုနှစ်၊ ဇွန်လ ၂၉ ရက်

.

အမေရိကန်နဲ့ အီရန်နိုင်ငံအကြား အပြန်အလှန် တိုက်ခိုက်မှုတွေကြောင့် ဟောမုဇ်ရေလက်ကြား သင်္ဘောသွားလာမှုတွေအပေါ် စိုးရိမ်မှုတွေ ပြန်လည်မြင့်တက်လာခဲ့ကြပြီး ရေနံဈေးတွေလည်း ပြန်ခုန်တက်လာကြပါပြီ။

.

.

နိုင်ငံတကာ ရေနံဈေးကွက်မှာတော့ ရေနံဈေးက ၀ ဒသမ ၉ ရာခိုင်နှုန်းမြင့်တက်လာခဲ့ပြီး အမေရိကန်နဲ့ အီရန် တိုက်ခိုက်မှုတွေကြောင့် ပုံမှန်နီးပါးပြန်ဖြစ်နေတဲ့ ဟောမုဇ်ရေလက်ကြား သင်္ဘောသွားလာမှုတွေ ပြန်လည် ထိခိုက်လာမှာကို စိုးရိမ်မှုတွေ မြင့်တက်လာခဲ့ကြတာပါ။

.

လက်ရှိမှာတော့ ကမ္ဘာ့ရေနံဈေးက တစ်စည်ကို အမေရိကန်ဒေါ်လာ ၇၃ ဒသမ ၂၁ ရှိခဲ့ပြီး တိုက်ခိုက်မှုတွေ ဖြစ်မလာခင်နေ့ကထက် ၁ ဒသမ ၂၇ ဒေါ်လာ မြင့်တက်လာခဲ့တာပါ။

.

ဩစတြေးလျနိုင်ငံ၊ ဆစ်ဒနီမြို့ရဲ့ဈေးကွက်သုံးသပ်သူ ဖေဘီယန်က “ရေနံဈေးပြန်တက်လာတာက အပစ်အခတ်တွေ ဖြစ်လာတဲ့အပေါ် ဈေးကွက်က တုံ့ပြန်နေတယ်ဆိုတာကို ပြနေတာပါ။ လက်ရှိမှာ အပစ်ရပ်သဘောတူညီချက်က အကောင်အထည်ဖော်ရေးအတွက် အသေးစိတ်ဆွေးနွေးတာ မရှိသလို တိုက်ခိုက်မှုတွေက ဆက်ဖြစ်နေတာပါ။ ကြာသပတေးနေ့တုန်းက ကုန်သင်္ဘောတစ်စီး တိုက်ခိုက်ခံရတာ လည်း လက်တွေ့အခြေအနေကို သတိပေးနေတာပဲဖြစ်ပါတယ်” လို့ ဆိုပါတယ်။

.

အာရှစတော့ဈေးကွက်ထဲမှာတော့ ဈေးတွေလှုပ်ခတ်နေခဲ့ပြီး ဒီနေ့မနက်ပိုင်းမှာ ဂျပန်နဲ့ တောင်ကိုရီးယား ဈေးကွက်တွေ ကျဆင်းခဲ့ပေမဲ့ ဟောင်ကောင်နဲ့ ထိုင်ဝမ်ဈေးကွက်တွေ ကတော့ မြင့်တက်ခဲ့တာပါ။ Ai လုပ်ငန်းတွေနဲ့ ဆက်နွယ်တဲ့ ဂျပန်နဲ့ တောင်ကိုရီးယား ကုမ္ပဏီတွေရဲ့ ရှယ်ယာတွေက အများဆုံး ကျဆင်းခဲ့တာဖြစ်ပြီး အကျိုးအမြတ်ပိုင်းဆိုင်ရာ မေးခွန်းတွေလည်း ထွက်လာခဲ့ကြပါတယ်။

.

ဂျပန်ရဲ့ နည်းပညာကုမ္ပဏီကြီးဖြစ်တဲ့ Softbank Group ရဲ့ရှယ်ယာတွေက ၅ ရာခိုင်နှုန်း ကျဆင်းခဲ့ပြီး တောင်ကိုရီးယားရဲ့နာမည်ကြီး ကုမ္ပဏီတွေဖြစ်ကြတဲ့ ဆမ်ဆောင်းနဲ့ SK Hynix တို့ရဲ့ရှယ်ယာတွေကလည်း ၅ ရာခိုင်နှုန်းလောက် ကျဆင်းခဲ့ကြပါတယ်။

.

လက်ရှိမှာတော့ အမေရိကန်နဲ့ အီရန်တို့အကြားမှာ တိုက်ခိုက်မှုတွေ ရပ်တန့်ခဲ့ပြီး စစ်ပွဲအဆုံးသတ်ရေး ဆွေးနွေးပွဲတွေ ပြန်လည်စတင်ဖို့ သဘောတူညီခဲ့ကြတဲ့အကြောင်း အမေရိကန်စစ်ဖက်က ထုတ်ပြန်ထား ပါတယ်။ လာမယ့် ဇွန်လ ၃၀ ရက်မှာ ကာတာနိုင်ငံ၊ ဒိုဟာမြို့မှာ ဆွေးနွေးပွဲလုပ်ဖို့ ပြင်ဆင်ထားခဲ့ကြပြီ လို့လည်း သတင်းတွေက ဖော်ပြနေကြပါသေးတယ်။

.

Source – Aljazeera

.