ဘတ် ၃ သန်းအလွဲသုံးစားမှုနဲ့ ထိုင်းဆရာတော်ဟောင်း ထောင် ၁၂ နှစ်ကျ

.

၂၀၂၆ ခုနှစ်၊ ဇူလိုင် ၄ ရက်

.

ထိုင်းနိုင်ငံ၊ ဖီချစ်ပြည်နယ်ရဲ့ မဟာနာယကဆရာတော်ဟောင်းတစ်ပါးကို ဗုဒ္ဓကောလိပ် ဖွံ့ဖြိုးတိုးတက်ရေး အတွက် လှူဒါန်းထားတဲ့ ဘတ် ၃ သန်း အလွဲသုံးစားလုပ်မှုနဲ့ ထောင်ဒဏ် ၁၂ နှစ်ချမှတ်လိုက်တယ်လို့ သိရပါတယ်။

.

.

ဖရာ သီဝတ်ချာရာဆစ်သီမီသီ လို့ နာမည်ကြီးခဲ့တဲ့ ပြည်နယ်မဟာနာယက ဆရာတော်ဟောင်းကို အကျင့်ပျက်ခြစားမှုဆိုင်ရာ ဗဟိုတရားရုံးက ထောင်ဒဏ် ၁၂ နှစ်ကျခံဖို့ ဇူလိုင် ၂ ရက်နေ့က အမိန့်ချခဲ့ပြီး အလွဲသုံးစားလုပ်ထားခဲ့တဲ့ ဘတ် ၃ သန်းကိုလည်း တက္ကသိုလ်ထံ ပြန်လည်ပေးလျော်ဖို့ အမိန့်ချခဲ့ တာဖြစ်ပါတယ်။

.

ဆရာတော်အဖြစ်ကနေ လူဝတ်လဲထားခဲ့တဲ့ ဝီရတ် ဟာ ထိုင်းနိုင်ငံထဲမှာ အကြီးအကျယ်ဂယက်ရိုက်ခဲ့တဲ့ “Sika Golf” လို့ လူသိများတဲ့ အမျိုးသမီးနဲ့ ပတ်သက်တဲ့ လိင်အရှုပ်တော်ပုံမှာ ပါဝင်ပတ်သက်ခဲ့တဲ့ နာမည်ကျော် သံဃာတော်တွေထဲက တစ်ပါးလည်းဖြစ်တာပါ။

.

ဒီအမှုရဲ့အဓိက ဇာတ်ကောင်က အသက် ၃၅ နှစ်အရွယ် ဝီလာဝန် အမ်ဆာဝတ် ဖြစ်ပြီး နာမည်ကြီး သံဃာတော်တွေနဲ့ ရင်းနှီးတဲ့ ကိုယ်ရေးကိုယ်တာ ဆက်ဆံရေးတွေတည်ဆောက်ခဲ့ပြီး ငွေကြေး လိမ်လည်မှုတွေ ပြုလုပ်ခဲ့တာလို့ စွပ်စွဲခံခဲ့ရတာပါ။ ဒီအမှုကို ရဲတပ်ဖွဲ့က စုံစမ်းစစ်ဆေးမှုတွေ ပြုလုပ် ခဲ့ပြီးတဲ့နောက် လူအများအပြား ဖမ်းဆီးခံခဲ့ရတာပါ။

.

တရားရုံးရဲ့ ဆုံးဖြတ်ချက်အရ ဝီရတ် ဟာ အမှုဖြစ်ပွားစဉ်က ဖီချစ်ပြည်နယ်မှာရှိတဲ့ ဝပ်သာလောင်း ကျောင်းတိုက်ရဲ့ ကျောင်းထိုင်ဆရာတော်ဖြစ်နေခဲ့ပြီး ပြည်နယ်မဟာနာယကနဲ့ ဖီချစ်ဗုဒ္ဓကောလိပ်ကို ကြီးကြပ်ရတဲ့ ဒါရိုက်တာ တာဝန်ကိုလည်း ယူထားခဲ့တာပါ။

.

အစိုးရ ရှေ့နေတွေရဲ့အဆိုအရ အလှူရှင်တစ်ဦးက ဗုဒ္ဓကောလိပ်ဖွံ့ဖြိုးတိုးတက်ရေးအတွက် ဘတ် ၃ သန်း လှူခဲ့ပြီး အဲဒီငွေတွေကို ဝီရတ် ရဲ့ ကိုယ်ပိုင်ဘဏ်အကောင့်ထဲ လွှဲပြောင်းပေးခဲ့တာပါ။ ဒါပေမဲ့လည်း ဝီရတ်က အဲဒီငွေတွေကို တက္ကသိုလ်ရဲ့ ဘဏ်အကောင့်ထဲ လွှဲပြောင်းပေးခြင်း မပြုလုပ်ခဲ့ကြောင်း ဖော်ထုတ်နိုင်ခဲ့ ပါတယ်။

.

စစ်ဆေးမှုတွေအရ ဝီရတ်ဟာ ဝီလာဝန်နဲ့ ပူးပေါင်းခဲ့ပြီး အလှုငွေကို ကိုယ်ကျိုးအတွက် အသုံးပြုခဲ့တာဖြစ်တဲ့ သက်သေတွေ တွေ့ရှိခဲ့ရပါတယ်။ ဒါကြောင့်ပဲ ထိုင်းတရားရုံးက ဝီရတ် ကို နိုင်ငံပိုင်ပစ္စည်းအလွဲသုံးစားမှုနဲ့ အပြစ်ရှိကြောင်းဆုံးဖြတ်ခဲ့ပြီး ထောင် ၁၂ နှစ် ချခဲ့တာပါ။

.

ထိုင်းနိုင်ငံရဲ့ ဥပဒေအရ အကြီးတန်းသံဃာတော်တွေက နိုင်ငံတော်ကနေ လစဉ်ထောက်ပံ့ကြေးတွေ ရရှိနေတာကြောင့် နိုင်ငံ့ဝန်ထမ်းအဖြစ် သတ်မှတ်ခံထားရတာပါ။

.

ဝီရတ်က စစ်ဆေးမှုနဲ့ တရားရုံးကြားနာမှု တစ်လျှောက်လုံး အာမခံ လျှောက်ထားခွင့်မရခဲ့ဘဲ ဖမ်းဆီးခံရပြီး နောက်ပိုင်းကတည်းက အချုပ်ထဲမှာ ထိန်းသိမ်းခံထားရတာဖြစ်ပါတယ်။

.

ဝီရတ် ဟာ ဝီလာဝန်နဲ့ ပတ်သက်ခဲ့တယ်ဆိုတဲ့ စွပ်စွဲချက်တွေ ပြင်းထန်လာပြီးတဲ့နောက် ပြီးခဲ့တဲ့နှစ် ဇူလိုင် ၁၅ မှာ သံဃာဘဝကနေ လူထွက်ခဲ့တာပါ။ ဒီ လိင်အရှုပ်တော်ပုံ ပေါ်ပေါက်လာပြီးတဲ့နောက် သံဃာဘဝ ကနေ နှင်ထုတ်ခံရမယ့်အစား နုတ်ထွက်ခဲ့တဲ့ အကြီးတန်းသံဃာတော်  ကိုးပါး အနက်က တစ်ပါးလည်း ဖြစ်လာခဲ့ပါတယ်။

.

Source – Bangkok Post

.