အောင်ပန်းမြို့မဈေးအတွင်း ဆိုင်ခန်း ဖောက်ထွင်း ခိုးယူခံရမှုများ မကြာခဏ ဖြစ်ပွားနေ

ရှမ်းပြည်နယ်တောင်ပိုင်း၊ ကလောမြို့နယ်၊ အောင်ပန်းမြို့မဈေးအတွင်း၌ ဆိုင်ခန်းဖောက်ထွင်း ခိုးယူခံရမှုများ မကြာခဏ ဖြစ်ပွားနေကြောင်း သိရသည်။
.
ပြီးခဲ့သည့် မေလအတွင်းက အောင်ပန်းမြို့မဈေး အတွင်းရှိ ရွှေခဲကုန်စုံဆိုင် ဖောက်ထွင်းခံခဲ့ရပြီး အခြား ဆိုင်များတွင်လည်း ဖောက်ထွင်း ခိုးယူခံရမှုများ မကြာခဏ ဖြစ်ပွားနေသည်ဟု ဈေးသူ/ဈေးသားများထံက သိရသည်။
.
“တာဝန်ယူမှု၊ တာဝန်ခံမှု ရှိစေချင်တာပါ။ လုံခြုံရေးကြေး ကောက်ထားလား၊ ကောက်ထားရင် ဘယ်သူ့ကို ခန့်ထားလဲ။ ဒါတွေကို စည်ပင်အနေနဲ့ စိစစ်ပြီးတော့ နောက်နောင် ဒါမျိုး မဖြစ်အောင် တာဝန်ယူပေးစေ ချင်ပါတယ်။ ဈေးခေါင်းတွေကိုလည်း တိုင်ထားပါတယ်။ သူတို့ကတော့ တာဝန် ယူမပေးဘူး” ဟု အောင်ပန်း မြို့မဈေးအတွင်း ဈေးရောင်းချနေသည့် ဈေးသည် တစ်ဦးက ပြောသည်။
.
အောင်ပန်းမြို့မဈေး ညလုံခြုံရေးအတွက် ယခင်က ဈေးသူ၊ ဈေးသားများထံ ငွေကြေးကောက်ခံ ညစောင့် ထားရှိခဲ့သော်လည်း ယခုအခါ အစောင့် ထားရှိခြင်း မရှိကြောင်း ၎င်းထံ သိရသည်။
.
အဆိုပါကိစ္စနှင့် ပတ်သက်၍ တာဝန်ရှိသူ တစ်ဦးက “အခုလက်ရှိ လုံခြုံရေး တစ်ဦး၊ နေ့စားဝန်ထမ်း တစ်ဦး၊ ၂ ဦး ရှိပါတယ်။ ညပိုင်းတော့ ရဲစခန်းလည်း အကြောင်းကြားထားပါတယ်။ ကျွန်တော်တို့လည်း (လုံခြုံရေး ကင်း) ပတ်တယ်။ သူတို့ကိုလည်း ကူညီပေးပါ ဆိုပြီး ပြောထားပါတယ်” ဟု ပြောဆိုခဲ့သည်။
.
ထို့အပြင် ယခင်က ဈေး လုံခြုံရေးအတွက် ဈေးသူ/ဈေးသားများထံ ငွေကြေး ကောက်ခံခဲ့သော်လည်း ဈေးကော်မတီ ဖျက်သိမ်းပြီးနောက် လုံခြုံရေးကြေး မကောက်ခံသည်မှာ တစ်နှစ်ခန့်ပင် ရှိပြီ ဖြစ်ပြီး လုံခြုံရေးအစောင့် ဝန်ထမ်း ခန့်ထားနိုင်ရန် ရှာဖွေခဲ့သော်လည်း လုပ်ကိုင်လိုသူ မရှိကြောင်း ၎င်းထံက သိရသည်။
.
အောင်ပန်းမြို့သည် မိတ္ထီလာ-သာစည်-ကလော-တောင်ကြီး-ကျိုင်းတုံ-တာချီလိတ် ပြည်ထောင်စုလမ်းမကြီး ပေါ်တွင် တည်ရှိပြီး ရထားလမ်းဆုံ၊ ကားလမ်းဆုံမြို့ ဖြစ်သည့်အပြင် ရှမ်းပြည်နယ်နှင့် မြန်မာပြည်မ အကြား ကုန်စည်စီးဆင်းမှု အားအကောင်းဆုံးနှင့် အချက်အခြာအကျဆုံး စီးပွားရေးဗဟိုချက်မြို့ တစ်မြို့ ဖြစ်ကြောင်း သိရသည်။
.
#KBZTai #Shan #AungBan