ထိုင်းနိုင်ငံတွင်း မူးယစ်ကွန်ရက် နှိမ်နှင်းမှုမှာ ရဲတပ်ဖွဲ့ ဒုဗိုလ်မှူးကြီးတစ်ဦး အဖမ်းခံရ

.

၂၀၂၆ ခုနှစ်၊ ဇူလိုင် ၂ ရက်

.

ထိုင်းနိုင်ငံအတွင်း တစ်နှစ်ကြာ စုံစမ်းစစ်ဆေးမှု ပြုလုပ်ခဲ့ရတဲ့ အကြီးစား မူးယစ်ဆေးဝါးကွန်ရက် နှိမ်နှင်းမှု စစ်ဆင်ရေးအပြီးမှာ ရဲတပ်ဖွဲ့ ဒုဗိုလ်မှူးကြီးတစ်ဦး အပါအဝင် အခြား သံသယရှိသူ ၉ ဦးကို ဖမ်းဆီးခဲ့ပြီး ဘတ် ၁၆ သန်းကျော်တန်ဖိုးရှိ ပိုင်ဆိုင်မှုတွေ သိမ်းဆည်းခဲ့တဲ့အကြောင်း ရဲတပ်ဖွဲ့က ဇူလိုင် ၁ ရက်မှာ ထုတ်ပြန် လိုက်ပါတယ်။

.

.

ဖမ်းဆီးမှုတွေကို ပြီးခဲ့တဲ့ သီတင်းပတ်အတွင်း ချင်းရိုင်နဲ့ လိုဝီပြည်နယ်တွေမှာ ပြုလုပ်ခဲ့တာပါ။

.

ဒီစစ်ဆင်ရေးကို ထိုင်းဝန်ကြီးချုပ် အနုတင်ရဲ့ “War on Drugs” မူးယစ်ဆေးဝါးတိုက်ဖျက်ရေး မူဝါဒအရ ဆောင်ရွက်ခဲ့တာဖြစ်ပြီး မူးယစ်ဆေးဝါး ကွန်ရက်တွေမှာ ပါဝင်နေတဲ့၊ အကူအညီပေးနေတဲ့ အစိုးရဝန်ထမ်းတွေ ကို အရေးယူဖို့ ရည်ရွယ်ထားတာလည်း ဖြစ်ပါတယ်။

.

ဒီစုံစမ်းစစ်ဆေးမှုကို ပြီးခဲ့တဲ့ မေလကနေ စတင်ခဲ့တာဖြစ်ပြီး ချင်းရိုင်မှာ ကီတာမင်း ၅၂၉ ကီလိုဂရမ် ဖမ်းဆီးရမိခဲ့တဲ့ အမှုကနေ စတင်ခဲ့တာပါ။

.

အဲဒီနောက် ၃ လအကြာမှာ ထိုင်းနိုင်ငံထဲကို ဝင်ရောက်လာတဲ့ မူးယစ်ကွန်ရက်ရဲ့အဓိက ခေါင်းဆောင်တစ်ဦး ကို လူဝင်မှုကြီးကြပ်ရေးအရာရှိတွေက ဖမ်းဆီးနိုင်ခဲ့တာကနေ ကွင်းဆက်ဖမ်းဆီးမှုတွေ ဆက်တိုက် ပေါ်ပေါက် လာခဲ့တာပါ။

.

ပြီးခဲ့တဲ့ ဇွန်လ ၂၂ ရက်မှာတော့ စုံစမ်းစစ်ဆေးရေးအဖွဲ့က လိုဝီပြည်နယ်မှာ ရဲတပ်ဖွဲ့ ဒုဗိုလ်မှုးကြီး တစ်ယောက်ကို ဖမ်းဆီးလိုက်ပြီး အစိုးရရဲ့ လျှို့ဝှက်တဲ့ သတင်းအချက်အလက်တွေကို မူးယစ်ကွန်ရက် တွေဆီ ပေါက်ကြားစေခဲ့ပြီး သံသယရှိသူတွေကို ဥပဒေရဲ့အရေးယူမှုကနေ ရှောင်လွှဲနိုင်ဖို့ ကူညီပေးခဲ့တယ် လို့လည်း ရဲတပ်ဖွဲ့က ယုံကြည်နေတာပါ။

.

ဗိုလ်မှူးကြီးက ရဲတပ်ဖွဲ့ရဲ့စွဲချက်တွေကို ဝန်ခံခဲ့ပြီး သူ့ရဲ့ရုံးခန်းအတွင်း ဝင်ရောက်ရှာဖွေမှုမှာလည်း အလုပ်စားပွဲ အံဆွဲထဲမှာ ဝှက်ထားတဲ့ မက်သာဖက်တမင်း ဆေးပြား ၇၅ ပြားကို တွေ့ရှိခဲ့ရတာဖြစ်ပါတယ်။

.

နောက်တစ်ရက်မှာတော့ လိုဝီပြည်နယ်မှာပဲ နောက်ထပ် သံသယရှိသူတစ်ဦးကို ထပ်မံဖမ်းဆီးခဲ့ပြီး အဲဒီအမျိုးသားက မူးယစ်ကွန်ရက်အတွက် ငွေလွှဲတွေကို လက်ခံခြင်းနဲ့ သယ်ယူပို့ဆောင်ရေးစရိတ်တွေ ပေးချေဖို့ တာဝန်ယူဆောင်ရွက်ခဲ့တဲ့သူ လို့ သိရပါတယ်။

.

Source – Bangkok Post

.