အမေရိကန်၏ ရန်လိုမူဝါဒ မပြောင်းလဲသေးဟု မြောက်ကိုရီးယား ပြော၊ နျူကလီးယား လက်နက်များ ဆက်တိုးချဲ့မည်

.

၂၀၂၆ ခုနှစ်၊ ဩဂုတ်လ ၃၁ ရက်

.

မြောက်ကိုရီးယားက အမေရိကန်ရဲ့ ရန်လိုတဲ့မူဝါဒဟာ အခုအချိန်အထိ ပြောင်းလဲမှုမရှိသေးဘူးလို့ တနင်္လာနေ့မှာ ပြောလိုက်ပါတယ်။

.

.

ဒါ့အပြင် နျူကလီးယားလက်နက်တွေဟာ နိုင်ငံရဲ့ အချုပ်အခြာ အာဏာကို အပြည့်အဝ အာမခံပေးနိုင်တဲ့ အရာ ဖြစ်တာကြောင့် ဆက်လက်ပြီး အင်အားတိုးမြှင့် သွားမယ်လို့လည်း ဆိုပါတယ်။

.

မြောက်ကိုရီးယားအစိုးရပိုင် KCNA သတင်းဌာနက ဖော်ပြတဲ့ နိုင်ငံခြားရေးဝန်ကြီးဌာနရဲ့ ကြေညာချက် မှာတော့ ဒေသတွင်း တင်းမာမှုတွေ လျော့ကျလာမယ်လို့ မျှော်လင့်တာဟာ အဓိပ္ပာယ်မရှိဘူးလို့ ပြောထား ပါတယ်။

.

ဒါ့အပြင် အမေရိကန်အပေါ် မြောက်ကိုရီးယားရဲ့ မူဝါဒဟာလည်း လုံးဝ ပြောင်းလဲသွားခြင်းမရှိဘူးလို့ ထပ်မံပြောဆိုထားပါတယ်။

.

မြောက်ကိုရီးယားနဲ့ အမေရိကန်ကြား နျူကလီးယားအရေး ဆွေးနွေးမှုတွေဟာ ၂၀၁၉ ခုနှစ်က ထရမ့်နဲ့ ကင်ဂျုံအန် တို့ရဲ့ ဟနွိုင်းထိပ်သီးတွေ့ဆုံမှု ပျက်ပြားပြီးနောက်ပိုင်း အဓိကအားဖြင့် ရပ်တန့်နေခဲ့တာ ဖြစ်ပါတယ်။ အမေရိကန်ဘက်ကတော့ မြောက်ကိုရီးယားရဲ့ နျူကလီးယားလက်နက် ဖျက်သိမ်းရေးကို ရည်မှန်းချက်အဖြစ် ဆက်လက်ထားရှိနေပါတယ်။

.

ဒါပေမဲ့ မြောက်ကိုရီးယားဘက်ကတော့ နျူကလီးယားလက်နက်တွေကို နိုင်ငံလုံခြုံရေးနဲ့ အချုပ်အခြာ အာဏာကို ကာကွယ်ပေးနိုင်တဲ့ အဓိကအင်အားအဖြစ် သတ်မှတ်ထားပြီး နျူကလီးယား အင်အားကို စွန့်လွှတ်မှာမဟုတ်ဘူးဆိုတဲ့ မူဝါဒကို ပိုမိုခိုင်မာလာအောင် ပြသနေပါတယ်။

.

၂၀၂၆ ခုနှစ် ဖေဖော်ဝါရီလမှာ ကျင်းပခဲ့တဲ့ အလုပ်သမားပါတီ ၉ ကြိမ်မြောက်ကွန်ဂရက်မှာလည်း နျူကလီးယားလက်နက် ဖျက်သိမ်းရေးဟာ ဆွေးနွေးညှိနှိုင်းနိုင်တဲ့ ကိစ္စမဟုတ်ဘူးဆိုတဲ့ ရပ်တည်ချက် ကို ထပ်မံအတည်ပြုခဲ့ပါတယ်။

.

အခုလတ်တလောမှာလည်း ထရန့် အစိုးရက မြောက်ကိုရီးယားနဲ့ ဆက်ဆံရေး ပြန်လည်တိုးမြှင့်ဖို့ အရိပ် အယောင်တွေ ပြသနေပါတယ်။ ဩဂုတ်လအတွင်း အမေရိကန်နဲ့ တောင်ကိုရီးယားတို့ရဲ့ နှစ်စဉ် စစ်ရေး လေ့ကျင့်မှုကို လျှော့ချခဲ့ပြီး၊ ထရန့်က မြောက်ကိုရီးယားနဲ့ သူ့ရဲ့ ဆက်ဆံရေး ကောင်းမွန်တယ်လို့ ပြောထား ပါတယ်။

.

ဒါပေမဲ့ အမေရိကန်ဘက်က စစ်ရေးလေ့ကျင့်မှုကို လျှော့ချခဲ့တာတောင် မြောက်ကိုရီးယားက အမေရိကန်ရဲ့ ရန်လိုတဲ့ မူဝါဒ ပြောင်းလဲသွားပြီလို့ မယူဆဘဲ မကြာသေးခင်က တာတိုပစ် ပဲ့ထိန်းဒုံးကျည် ၁၀ စင်းခန့် ပစ်လွှတ်ခဲ့ပါတယ်။

.

မြောက်ကိုရီးယားဘက်ကလည်း အမေရိကန်က နျူကလီးယားဖျက်သိမ်းရေး တောင်းဆိုချက်ကို စွန့်လွှတ်မှသာ ဆွေးနွေးရေး ပြန်စနိုင်မယ့် အခြေအနေကို ရည်ညွှန်းထားပါတယ်။

.

ဒီနေ့ထုတ်ပြန်ချက်ဟာ ထရန့်အစိုးရဘက်က မြောက်ကိုရီးယားနဲ့ ဆက်ဆံရေး ပြန်ကောင်း လာအောင် အချက်ပြနေပေမဲ့ ပြုံယမ်းဘက်ကတော့ နျူကလီးယားလက်နက်ကို လျှော့ချဖို့ထက် ဆက်လက်တိုးမြှင့်ပြီး အမေရိကန်အပေါ် မူဝါဒလည်း မပြောင်းသေးဘူးဆိုတာကို ပြန်လည်အတည်ပြုလိုက်တာ ဖြစ်ပါတယ်။

.