နည်းပညာပိုင်းဆိုင်ရာ အကူအညီတွေ လိုအပ်နေတယ်လို့ နီပေါ နိုင်ငံခြားရေးဝန်ကြီး ပြော

တရုတ်နိုင်ငံနဲ့ နယ်စပ်ချင်း ထိစပ်နေတဲ့ ဟိမဝန္တာတောင်တန်းဒေသမှာ ဒီသီတင်းပတ်အတွင်း ဖြစ်ပွား ခဲ့တဲ့ အကြီးအကျယ် ရေကြီးမှုအပြီး နီပေါနိုင်ငံအနေနဲ့ ကိုယ်ပိုင်ကျွမ်းကျင်မှုနဲ့ နည်းပညာ မလုံလောက်တဲ့ အထူးပြု လုပ်ငန်းတွေမှာ နိုင်ငံခြားအကူအညီ လိုအပ်နေတယ်လို့ နီပေါနိုင်ငံခြားရေးဝန်ကြီး ရှီရှီရ် ခါနယ်က ပြောပါတယ်။ ဒါပေမယ့် ရှာဖွေကယ်ဆယ်ရေး လုပ်ငန်းတွေအတွက်တော့ နိုင်ငံခြားအကူအညီ မလိုအပ်ဘူးလို့ ဆိုပါတယ်။

.

ဗုဒ္ဓဟူးနေ့က ရေခဲမြစ် ပြိုကျမှု ဖြစ်ပွားခဲ့ပြီးနောက် ကျောက်တုံးတွေ၊ ရေခဲတွေ၊ ရွှံ့နွံတွေနဲ့ အပျက်အစီးတွေဟာ ဟိမဝန္တာ တောင်တန်းတွေက မြစ်ကြောင်းစနစ်တွေ တစ်လျှောက် အရှိန်အဟုန်နဲ့ စီးဆင်းလာခဲ့တာ ဖြစ်ပါတယ်။

.

အဲဒီဖြစ်ရပ်ကြောင့် နီပေါနဲ့ တရုတ်နိုင်ငံ တိဘက်ဒေသမှာ လူ ၆၀၀ ကျော် သေဆုံးခဲ့ပြီး လူပေါင်း ၂,၀၀၀ ကျော်လည်း ပျောက်ဆုံးနေဆဲ ဖြစ်ပါတယ်။

.

တရုတ်နိုင်ငံနဲ့ နယ်စပ်ချင်း ထိစပ်နေတဲ့ ဒေသတွေမှာ ဖြစ်ပွားခဲ့တဲ့ ရေကြီးမှုကြောင့် မြို့တွေ တစ်ခုလုံး နီးပါး ပျက်စီးသွားခဲ့သလို ရေအားလျှပ်စစ် စက်ရုံတွေလည်း ထိခိုက် ပျက်စီးခဲ့ပါတယ်။

.

Kathmandu Post သတင်းစာရဲ့ ဖော်ပြချက်အရ အိန္ဒိယ၊ တရုတ်၊ အမေရိကန်၊ ဗြိတိန်၊ ဂျပန်၊ တောင်ကိုရီးယား၊ သီရိလင်္ကာနဲ့ ဘင်္ဂလားဒေ့ရှ်နိုင်ငံတွေက ရှာဖွေကယ်ဆယ်ရေးအဖွဲ့တွေကို စေလွှတ်ပြီး ကယ်ဆယ်ရေးလုပ်ငန်းတွေမှာ ပါဝင်ကူညီခွင့်ပြုဖို့ နီပေါအစိုးရကို တောင်းဆို ထားကြပါတယ်။

.

ဒါပေမယ့် နီပေါနိုင်ငံခြားရေးဝန်ကြီး ရှီရှီရ် ခါနယ်ကတော့ ဥမင်လိုဏ်ခေါင်းတွေထဲ ပိတ်မိနေသူတွေကို ကယ်ဆယ်တာ၊ တံတားတွေ ပျက်စီးသွားတဲ့နေရာတွေမှာ သယ်ယူပို့ဆောင်ရေးနဲ့ ဆက်သွယ်ရေး လမ်းကြောင်းတွေ ပြန်ဖွင့်တာ၊ သေဆုံးသူတွေရဲ့ ရုပ်အလောင်းတွေကို အတည်ပြုဖော်ထုတ်တာ၊ DNA စစ်ဆေးတာနဲ့ ရုပ်အလောင်းတွေကို အချိန်ကြာကြာ ထိန်းသိမ်းထားနိုင်ဖို့ လိုအပ်တဲ့ နည်းပညာပိုင်းဆိုင်ရာ စတဲ့ ကဏ္ဍတွေမှာသာ နိုင်ငံခြားအကူအညီ လိုအပ်တယ်လို့ ပြောပါတယ်။

.

“ကျွန်တော်တို့မှာ ကျွမ်းကျင်မှုနဲ့ နည်းပညာပိုင်းဆိုင်ရာ အသိပညာ မလုံလောက်တဲ့ ကဏ္ဍတွေမှာ အထူးပြုဝန်ဆောင်မှုတွေနဲ့ နည်းပညာအကူအညီတွေ ရရှိဖို့ တောင်းဆိုထားပြီးပါပြီ” လို့ ခါနယ်က ပြောပါတယ်။

.

နီပေါနိုင်ငံဟာ ဟိမဝန္တာတောင်တန်းဒေသမှာ အိန္ဒိယနဲ့ တရုတ်နိုင်ငံကြား တည်ရှိတာဖြစ်ပြီး ရေကြီးမှုကြောင့် တံတား ၂၄ စင်းခန့် ပျက်စီးသွားခဲ့ပါတယ်။ ဒါကြောင့် သယ်ယူပို့ဆောင်ရေးနဲ့ ဆက်သွယ်ရေးတွေ အမြန်ဆုံး ပြန်လည်လုပ်ဆောင်နိုင်ဖို့ အိန္ဒိယနဲ့ တရုတ်နိုင်ငံထံက ယာယီတပ်ဆင် အသုံး ပြုနိုင်တဲ့ ဘေလီ တံတားတွေ ပေးပို့ ကူညီဖို့လည်း နီပေါဘက်က တောင်းဆိုထားပါတယ်။

.

သောကြာနေ့ အစောပိုင်းမှာ နီပေါနိုင်ငံခြားရေးဝန်ကြီးဌာနက ရှာဖွေကယ်ဆယ်ရေး လုပ်ငန်းတွေကို နီပေါနိုင်ငံ အနေနဲ့ ကိုယ်တိုင် ဆောင်ရွက်နိုင်တယ်လို့ ပြောပြီး နိုင်ငံခြားက ကယ်ဆယ်ရေးအဖွဲ့တွေ ဝင်ရောက်ကူညီဖို့ ကမ်းလှမ်းချက်တွေကို ငြင်းပယ်ထားခဲ့ပါတယ်။

.

အဲဒီလို နိုင်ငံခြား အကူအညီကို ငြင်းပယ်ထားတဲ့ သူ့အစိုးရရဲ့ ရပ်တည်ချက်နဲ့ ပတ်သက်ပြီး မေးမြန်း ရာမှာ နိုင်ငံခြားရေးဝန်ကြီး ရှီရှီရ် ခါနယ်က အထွေထွေ ရှာဖွေကယ်ဆယ်ရေး လုပ်ငန်းတွေအတွက် တော့ နိုင်ငံခြား အကူအညီ မလိုအပ်ဘဲ အဲဒီလုပ်ငန်းတွေကို နီပေါ ကယ်ဆယ်ရေးအဖွဲ့တွေက ကိုယ်တိုင် ဆောင်ရွက်နေကြတာ ဖြစ်တယ်လို့လည်း ဆိုပါတယ်။

.

လိုနေတာကတော့ နည်းပညာဆိုင်ရာ အကူအညီတွေနဲ့ အထူးပြုဝန်ဆောင်မှုတွေမှာသာ နိုင်ငံခြား အကူအညီ လိုအပ်နေတာလို့ နိုင်ငံခြားရေးဝန်ကြီး ရှီရှီရ် ခါနယ်က ပြောပါတယ်။

.

Ref – CNA