တောင်ကြီးတွင် ကားပစ္စည်းများ မကြာခဏ ဖြုတ်ခိုးခံနေရ

.

၂၀၂၆ ခုနှစ်၊ စက်တင်ဘာလ ၅ ရက်

.

ရှမ်းပြည်နယ်မြို့တော် တောင်ကြီးမြို့တွင် လမ်းဘေးရပ်နားထားသည့် ကားများ၏ အစိတ်အပိုင်း ပစ္စည်းများ မကြာခဏ ဖြုတ်ခိုးခံနေရကြောင်း ယာဉ်ပိုင်ရှင်များထံက သိရသည်။

.

.

ခိုးယူသူများက ကားနောက်ကြည့်မှန်၊ ကားဆွဲပေါက် အဖုံး စသည့် ဖြုတ်ယူရလွယ်သည့် အစိတ်အပိုင်းများကို ခိုးယူနေကြခြင်းဖြစ်ပြီး ခိုးယူခံရသည့် ကားပိုင်ရှင်များအနေဖြင့် ငွေကြေးအပိုကုန်ကျသည့်အပြင် အလုပ် အပျက်ခံ၍ ဝပ်ရှော့ပို့ကာ ပြန်လည်ပြင်ဆင်နေရကြောင်း သိရသည်။

.

“ဒီဘက်မှန်လို ကားဆွဲပေါက် အဖုံးလိုဟာတွေက ပြန်ရောင်းလို့လည်း ဘယ်လောက်မှ ရတာမဟုတ်ဘူး။ ကားပိုင်ရှင်အတွက်တော့ တော်တော်ကို ဒုက္ခများတယ်။ ဘက်မှန်မရှိရင် သွားလို့က မရတော့ဘူး။ အလုပ် ပျက်၊ အကိုင်ပျက်နဲ့ ပြန်ရှာဝယ်တပ်ရတာပေါ့” ဟု နောက်ကြည့်မှန် ခိုးယူခံရသည့် ယာဉ်ပိုင်ရှင်တစ်ဦးက ပြောသည်။

.

ထို့အတူ ကားဝပ်ရှော့များတွင်လည်း ကားရှေ့ရှိ ဆွဲပေါက်အဖုံး ခိုးယူခံရသဖြင့် လာရောက်ပြင်ဆင်သည့် ကား များစွာရှိနေပြီး ဆွဲပေါက်အဖုံး ပျောက်ဆုံးသွားသည့် ကားများကို မူလအတိုင်း အဖုံးသစ် ပြန်လည်တပ်ဆင် ပေးခြင်း သို့မဟုတ် ဆွဲပေါက်နေရာကို ပြန်လည်ဖာထေးပေးခြင်းများ ပြုလုပ်ပေးနေရသည်ဟု ကားဝပ်ရှော့ များထံက သိရသည်။

.

ကားဆွဲပေါက်အဖုံးများမှာ ကားအမျိုးအစားနှင့် ဒီဇိုင်းပေါ်မူတည်၍ ပုံစံကွဲပြားပြီး ပျောက်ဆုံးသွားသည့် နေရာကို ပြန်လည်ပြုပြင်ရာတွင်လည်း ကားပိုင်ရှင်များ၏ လိုအပ်ချက်အပေါ်မူတည်၍ နည်းလမ်းအမျိုးမျိုး အသုံးပြုကြကြောင်း သိရသည်။

.

“တချို့က အဝိုင်း၊ တချို့က လေးထောင့်ပုံစံ ဖြစ်ပါတယ်။ ပြန်ပြင်တဲ့အခါ ဆေးမှုတ်ပေးတာရှိသလို စတေကာ ကပ်ပြီး ပြန်လုပ်တဲ့သူတွေလည်း ရှိပါတယ်” ဟု ကားဝပ်ရှော့ ပိုင်ရှင်တစ်ဦးက ပြောသည်။

.

တောင်ကြီးမြို့ပေါ်ရှိ အထပ်မြင့် လူနေတိုက်ခန်း အများစုမှာ ကားပါကင် သီးခြား မပါရှိသဖြင့် ကားပိုင်ရှင် များမှာ ကားများကို လမ်းမပေါ်တွင် ညအိပ်ရပ်နားနေကြရခြင်းဖြစ်ပြီး ခိုးယူသူများအား ဖိတ်ခေါ်သလို ဖြစ်နေသည်ဟု ဒေသခံများက ပြောဆိုကြသည်။

.

မြို့တော် တောင်ကြီးတွင် ယင်းကဲ့သို့ ကားပစ္စည်းများ ဖြုတ်ခိုးခံရမှုများ မကြာခဏဆိုသလို ဖြစ်ပွားနေပြီး သက်ဆိုင်ရာ လုံခြုံရေးတာဝန်ရှိ အဖွဲ့အစည်းများအနေဖြင့် လှည့်ကင်း၊ ပတ်ကင်းများဖြင့် လုံခြုံရေးကို ပိုမို တိုးချဲ့ လုပ်ဆောင်ပေးစေလိုသည်ဟု ဒေသခံများထံက သိရသည်။

.